بیرونی خلاء پوری دنیا کے انسانوں کا مشترکہ ورثہ ہے، پاکستان

پاکستان نے اقوام متحدہ کے تمام رکن ممالک کو خلائی ٹیکنالوجی تک مساوی رسائی کا مطالبہ کیا ہے اور اس خدشہ کا اظہار کیا ہے کہ خلائی ٹیکنالوجی میں دوسروں پر سبقت رکھنے والے ممالک کے اقدامات خلاء میں ہتھیاروں کی دوڑ شروع کرنے کا باعث بن سکتے ہیں۔ اقوام متحدہ کی جنرل اسمبلی کی چوتھی کمیٹی سے خطاب کرتے ہوئے پاکستانی مندوب خالد محمود نے کہاکہ خلاء میں ہتھیاروں کی دوڑ بیرونی خلاء کے پرامن استعمال کی کوششوں کے لیے نقصان دہ ثابت ہوگی۔ بیرونی خلاء میں بین الاقوامی تعاون کے موضوع پر خطاب کرتے ہوئے انہوں نے کہاکہ بیرونی خلاء پوری دنیا کے انسانوں کا مشترکہ ورثہ ہے۔ انہوں نے کہاکہ اقوام متحدہ کے بیرونی خلاء کے استعمال کو شفاف بنانے میں اپنا کردار ادا کرنا چاہئے اور بیرونی خلاء کے تجارتی استعمال کے حوالہ سے قانون سازی کے لیے بین الاقوامی کنونشن بنایا جائے۔ انہوں نے قدرتی آفات کے بارے میں معلومات فراہم کرنے کے لیے بیرونی خلاء سے مدد کے حوالہ سے اقوام متحدہ کی طرف سے ادارے کے قیام کا بھی خیرمقدم کیا۔ پاکستانی مندوب نے کہا بیرونی خلاء کی تحقیق اور اس کے پرامن استعمال کے اقدامات میں زیادہ سے زیادہ ترقی پذیر ممالک کو شامل کیا جائے۔ انہوں نے بتایا کہ پاکستان نے تعلیم و مواصلات سے لے کر قدرتی آفات کی بروقت اطلاع تک ہر شعبہ میں خلائی ٹیکنالوجی کے استعمال میں نمایاں کامیابیاں حاصل کی ہیں۔ واضح رہے کہ پاکستان بیرونی خلاء کے پرامن استعمال کے حوالہ سے قائم کی گئی کمیٹی کا رکن ہے۔

بشکریہ
جنگ

__________________