کراچی (فارن ڈیسک) امریکی جریدہ نیوز ویک نے کالم نگار سیلگ ایس ہیری سن کا کالم ”پشتونستان سے ہوشیار“ کے عنوان سے شائع کیا ہے۔ رپورٹ میں کہا گیا ہے کہ جنوری میں ہو نے والے پارلیمانی انتخابات کا نتیجہ بھی وہی ہوگا جو پاکستان میں ہونیوالے زیادہ تر فوجی حکومت میں ہوئے ہیں۔ رپورٹ کے مطابق آنے والے انتخابات کا متوقع نتیجہ یہ ہوگا کہ بینظیر بھٹو کو وزیراعظم بننے کے لئے کافی نشستیں حاصل ہوجائیں گی لیکن اس قدر نہیں جس سے اقتدار میں بامعنی شرکت کا جواز حاصل ہوجائے، دوسرے لفظوں میں اس کا مطلب یہ ہوگا کہ فوج کا عمل دخل جاری رہے گا۔رپورٹ میں مزید کہا گیا ہے کہ طالبان بنیادی طور پر پشتون گروپ ہیں جو پاک، افغان سرحد کے دونوں طرف بسنے والے پشتونوں میں بغاوت کے جذبات بھڑکاتے ہیں۔ رپورٹ میں کہا گیا ہے کہ پشتون اور پاکستان کی دوسری نسلی اقلیتیں مثلاً بلوچی اور سندھی ایک لمبے عرصے سے پنجاب کی اجارہ داری کے خلاف مزاحمت کرتے چلے آرہے ہیں۔ رپورٹ میں کہا گیا ہے کہ ان تمام قرائن سے پتہ چلتا ہے کہ اس امر کاخدشہ ہورہا ہے کہ پشتونستان اسلامی قیادت کے تحت ابھرے گا۔ امریکا کو پاکستان میں آزادانہ انتخابات کی حمایت کرنی چاہئے اور مشرف پر دباؤ ڈالے کہ وہ اقتدار حقیقی غیر جانبدار نگران حکومت کے سپرد کریں جو اپوزیشن کے مشورہ سے ہو اور اس کے لئے امریکی امداد بند کرنے کی دھمکی بھی دی جاسکتی ہے۔

__________________