کراچی (اسٹاف رپورٹر) پاکستان مسلم لیگ (ق) سندھ کے صدر ڈاکٹر ارباب غلام رحیم نے کہا ہے کہ بینظیر بھٹو نے مختلف جلسوں میں ڈی سی اوز، ڈی پی اوز، ٹیچرز اور عدلیہ کے لوگوں کو دھاندلی کیلئے جس طرح اکسایا ہے، وہ بغاوت کے زمرے میں آتا ہے۔ بینظیر بھٹو یہ بیان دیکر لوگوں کے درمیان نفرتیں ابھار رہی ہیں۔ الیکشن کمیشن کو بینظیر بھٹو کے ان بیانات کا ازخود نوٹس لینا چاہئے اور بینظیر بھٹو کے خلاف کارروائی کرنی چاہئے۔ انہوں نے امید ظاہر کی ہے کہ ڈی سی اوز، ڈی پی اوز، ٹیچرز اور عدلیہ کے ارکان بینظیر کی اس دھونس دھمکی میں نہیں آئیں گے اور اپنے فرائض منصبی مثبت طریقے سے انجام دیں گے۔ بینظیر بھٹو اس طرح کے بیانات اس لئے دے رہی ہیں کیونکہ ان کے جلسے لگاتار ناکام ہورہے ہیں۔ جس کی تازہ مثال لاڑکانہ اور جیکب آباد کے جلسوں میں اسٹیڈیم کا خالی ہونا ہے۔ اس سے ثابت ہوتا ہے کہ پیپلز پارٹی سے لوگوں کا اعتبار اٹھ گیا ہے اور سندھ کے لوگ جان گئے ہیں کہ آئندہ آنے والی حکومت مسلم لیگ (ق) ہی کی ہوگی۔ انہوں نے کہا کہ سندھ کے عوام کی اکثریت پاکستان مسلم لیگ (ق) کے ساتھ ہے اور 8 جنوری کا دن پیپلز پارٹی کے تابوت میں آخری کیل ٹھونکنے کا دن ہوگا۔

__________________