اسلام آباد ... ناروے کے وزیر خارجہ نے بے نظیر بھٹو شہید کے قتل کو پیپلز پارٹی اور پاکستان دونوں کے لئے ایک بڑا نقصان قرار دیا ہے اور کہا ہے کہ عام انتخابات کا انعقاد ایسا شفاف ہونا چاہیے جس پر فخر کیا جاسکے ۔نارویجن وزیر خارجہ جونس گر نے اسلام آباد میں پیپلز پارٹی کے مرکزی سیکریٹریٹ کا دورہ کیا اور بے نظیر بھٹو کی یاد میں رکھی گئی تعزیتی کتاب میں اپنا پیغام درج کیا ۔ پیپلز پارٹی کے رہنماؤں نے انہیں اٹھارہ فروری کے عام انتخابات کے وقت پر اور شفاف انداز میں انعقاد کے حوالے سے اپنی پارٹی کے مطالبے سے آگاہ کیا ۔بعد میں میڈیا سے گفتگو میں ناروے کے وزیر خارجہ نے کہا کہ پاکستان دنیا کی توجہ کا مرکز بنا ہوا ہے اور ناروے بھی پاکستان کے حالات پر گہری نگاہ رکھے ہوئے ہے ۔ انہوں نے بے نظیر بھٹو ایک بڑی لیڈر قرار دیا ، جبکہ عام انتخابات کے حوالے سے ان کا کہنا تھا کہ الیکشن کا عمل شفاف ہونا چاہیئے کیونکہ اسے پوری دنیا دیکھ رہی ہے ۔نارویجن وزیر خارجہ نے کہا کہ الیکشن کے بعد حکومت سازی کا عمل بھی اتنا ہی اہم ہے ۔