کراچی…پیپلز پارٹی کے وائس چیئر مین مخدوم امین فہیم نے کہا ہے کہ محترمہ بینظیر بھٹو کی شہادت میں ملوث افراد پاکستان کو توڑنا چاہتے ہیں۔یہ بات انھوں نے نیویارک میں اقوام متحدہ کے دفتر کے سامنے پیپلز پارٹی کے احتجاجی مظاہرے سے ٹیلی فون خطاب کرتے ہوئے کہی ۔مخدوم امین فہیم نے کہا کہ پارٹی بلاول بھٹو اور آصف زرداری کی قیادت میں اتفاق رائے سے آگے بڑھ رہی ہے،اور محترمہ بے نظیر بھٹو کے مشن کو پورا کیا جائے گا ۔حکومت انتخابات میں دھاندلی کا منصوبہ تیار کررہی ہے اور اگر منصفانہ انتخابات ہوئے تو پیپلز پارٹی کامیاب ہوگی۔انھوں نے زوردیا کہ موجودہ حالات میں پیپلز پارٹی کے کارکنوں کا فرض ہے کہ وہ اپنی صفوں میں اتحاد برقرار رکھیں۔ احتجاجی مظاہرے سے پیپلز پارٹی امریکا کے رہنماؤں نے خطاب کرتے ہوئے مطالبہ کیا کہ محترمہ بے نظیر بھٹو کے قتل کی تحقیقات اقوام متحدہ کی زیرنگرانی کرائی جائیں ۔پیپلز پارٹی اس مطالبے کی حمایت میں اقوام متحدہ کے دفتر کے سامنے بھوک ہڑتالی کیمپ بھی لگائے گی۔

__________________