اسلام آباد ( نمائندہ) وزارت داخلہ کے ترجمان بریگیڈیئر (ر) جاوید اقبال چیمہ نے کہا ہے کہ بے نظیر بھٹو قتل کیس میں ضرورت پڑی تو تحقیقات کے اگلے عمل میں بعض لوگوں کے نام ای سی ایل میں شامل کئے جا سکتے ہیں ۔ انہوں نے کہاکہ ا سکاٹ لینڈ یارڈ ٹیم کی رپورٹ عوام کے سامنے پیش کی جائے گی۔ ٹیم کو تحقیقات کے عمل میں مکمل آزادی حاصل ہے، ان پر کوئی پابندی نہیں۔ تحقیقات سے پتہ چلے گا کہ محترمہ کی موت گولی لگنے یا سن روف لیور لگنے سیہوئی تھی، منگل کو ہفتہ وار بریفنگ کے دوران انہوں نے کہا کہ غیر ملکی ٹیم محترمہ کی شہادت کی حقیقی اسباب کا پتہ چلا رہی ہے۔ انہوں نے کہا کہ بے نظیر قتل کیس میں کسی خودکش بمبار کی نشاندہی ہوئی نہ گرفتاری اور نہ ہی کچھ لوگوں کو اسلام آباد لایا گیا ہے۔ یہ سراسر غلط اطلاع ہے جس میں کوئی صداقت نہیں ہے۔ انہوں نے کہا کہ اسکاٹ لینڈ یارڈ ٹیم سے کہا گیا ہے کہ وہ جلد سے جلد تحقیقات مکمل کرے۔ غیر ملکی ٹیم سانحہ لیاقت باغ کے تمام پہلوؤں کا جائزہ لے رہی ہے۔ بریگیڈیئر جاوید اقبال چیمہ نے محرم کے سیکیورٹی پلان کے حوالے سے کہا کہ حکومت کو یقین ہے کہ تمام لوگ محرم الحرام کے تقدس کا احترام کرینگے۔ تمام صوبائی حکومتوں اور حفاظتی اداروں کو چوکس رہنے کیلئے احکامات جاری کر دیئے گئے ہیں۔ ہم شہریوں سے اپیل کرتے ہیں کہ وہ حفاظتی اداروں کے ساتھ تعاون کریں۔ صوبہ سرحد میں مذہبی کشیدگی کے ساتھ ساتھ دہشت گردی بھی پائی جاتی ہے۔ داخلہ ترجمان نے کہا کہ سوات میں مذہبی انتہا پسندوں کے خلاف آپریشن جاری رہے گا۔ انہوں نے کہا کہ سرحد کے گورنر نے ذاتی وجوہ کی بناء پر استعفیٰ دیا تھا۔ اختلافات کی خبریں بے بنیاد ہیں۔