پاکستان پیپلز پارٹی کی چیئر پرسن بینظیر بھٹو جمعہ کو اپنی واپسی کے شیڈول کا اعلان کر رہی ہیں۔
اس سلسلے میں ملک کے وفاقی اور چاروں صوبائی دارالحکومتوں سمیت مختلف شہروں میں بیک وقت پریس کانفرنس کی جا رہی ہیں۔

پیپلز پارٹی پنجاب کے میڈیا ایڈوائزر کے مطابق بینظیر ٹیلی فونک خطاب کے ذریعے خود واپسی کی تاریخ کا اعلان کریں گی جبکہ پیپلز پارٹی کی چیئر پرسن بے نظیر کے پاکستان میں ترجمان فرحت اللہ بابر نے بی بی سی کو بتایا کہ اس بات کا فیصلہ جمعہ کی صبح کو ہی ہوگا کہ بینظیر براہ راست خطاب کریں گی یا پاکستان میں موجود پیپلز پارٹی کی قیادت بینظیر کی جانب سے شیڈول کا اعلان کیا جائے گا۔

بینظیر بھٹو نے گزشتہ ہفتے اعلان کیا تھا کہ وہ چودہ ستمبر کو اپنی واپسی کی تاریخ کا اعلان کردیں گی۔ یہ تاریخ اس لحاظ سے اہم ہے کہ اس سے اگلے ہی روز یعنی پندرہ ستمبر سے کسی بھی روز صدر جنرل پرویز مشرف آئینی طور پر اپنے دوبارہ انتخاب کی تاریخ کا اعلان کرسکتے ہیں۔

بینظیر نے دو روز قبل دبئی میں ایک پارٹی میٹنگ میں اپنی واپسی کے بارے میں صلاح ومشورہ کیا تھا۔ پارٹی ذرائع کے مطابق پیپلز پارٹی کے قائدین نے پاکستان لوٹتے ہی بینظیر کے استقبال کی تیاریوں کا آغاز کردیا ہے۔ پیپلز پارٹی پنجاب کے صدر شاہ محمود قریشی نے دبئی واپسی پر گوجرانوالہ ڈویژن کا ہنگامی تنظیمی اجلاس منعقد کیا ہے اور صوبے بھر کے شہروں میں اجلاس بلائے جارہے ہیں۔

سیاسی مبصرین کا کہنا ہے کہ نواز شریف کا حالیہ ناکام استقبال بھی بینظیر کے حامیوں کے پیش نظر ہوگا اور وہ ایسی کسی صورتحال سے بچنےکی کوشش کریں گے۔

پارٹی کارکنوں اور رہنماؤں کا کہنا ہے کہ آئندہ انتخابات میں کامیابی کے لیے استقبال کے شو کی کامیابی ازحد ضروری ہے۔

سیاسی حلقوں میں یہ بھی کہا جارہا ہے کہ بینظیر کی واپسی کے شہر کا انتخاب بھی ان کے استقبال کے سلسلے میں اہم ہے۔

بینظیر بھٹو کا سنہ انیس سو چھیانوے میں ہونے والے استقبال کو پاکستان کی حالیہ تاریخ کا سب سے بڑا سیاسی اجتماع قرار دیا جاتا ہے۔ شاہ محمود قریشی نے اپنے ایک بیان میں کہا ہے کہ پاکستان کے عوام ان کا سنہ انیس سو چھیاسی سے بھی بڑا استقبال کرنے کے لیے بے تاب ہیں۔

سیاسی مبصرین کا کہنا ہے کہ بینظیر کا استقبال نواز شریف کے استقبال سے مختلف ہوگا کیونکہ ایک تو پیپلز پارٹی کے کارکنوں کو سیاسی جدوجہد اور سڑکوں کی سیاست کا گہرا تجربہ ہے اور دوسری بات حکومت سے مفاہمت کی افواہوں نے کارکنوں کو تقویت دی ہے۔

شاہ محمود قریشی کا کہنا ہے کہ آج ہر شہر گاؤں اور قصبوں میں بے نظیر کی وطن واپسی کا تذکرہ ان کی سیاسی بصیرت کو تسلیم کرتے ہوئے کیا جا رہا ہے۔
بہر حال ابھی حکومتی حلقوں کی جانب سے ایسے کوئی اشارے نہیں ملے کہ بینظیر سے واپسی کی صورت میں کیا سلوک روا رکھا جائے گا۔

سنہ انیس سو چھیانوے میں اپنی حکومت کے خاتمے کے بعد سے بینظیر خودساختہ جلاوطنی کی زندگی گزار رہی ہیں۔ پاکستان میں عدالتوں نے ان کی غیر موجودگی میں انہیں قید کی سزا سنا رکھی ہے جبکہ بعض دوسرے ممالک میں بھی ان کے خلاف کرپشن کے ریفرنس زیر سماعت ہیں۔


بی بی سی