لاڑکانہ (بیورو رپورٹ) سپریم کورٹ آف پاکستان کے رٹائرڈ جسٹس رانا بھگوان داس نے کہا ہے کہ محترمہ بے نظیر بھٹو کا قتل قومی المیہ ہے اور یہ جمہوری قوتوں کا قتل ہے جس سے حکومت کی نالائقی اور ناکامی ظاہر ہوتی ہے۔وہ منگل کو بار روم لاڑکانہ میں صحافیوں سے بات چیت کر رہے تھے۔انہوں نے مزید کہا کہ عوام کے حقوق کے لئے مضبوط عدلیہ ضروری ہے اس لئے سیاسی ،سماجی کارکن اور وکلاء عدلیہ کی آزادی کے لئے جدوجہد تیز کریں تاکہ ججوں اور وکیلوں کو آزاد کرایا جاسکے جس سے ملک میں جمہوریت کا بول بالا ہوسکے ۔عدلیہ کی آزادی کی تحریک میں سیاسی جماعتوں کا کردار امیدافزاء نہیں ہے پھر بھی انہیں توقعہ ہے کے انتخابات کے بعد سیاسی جماعتیں وکلاء ،سول سوسائیٹی سے مل کر ملک میں آزاد عدلیہ کے لئے جدوجہد کریں گی۔قبل ازیں جسٹس رٹائرڈ رانا بھگوان داس نے ڈسٹرکٹ بار ایسوسی ایشن لاڑکانہ کو خطاب کرتے ہوئے کہا کہ عدلیہ کی آزادی کی تحریک میں لاڑکانہ کے وکلاء کا کردار ہمت افزا ء رہاہے اور وہ امید کرتے ہیں کہ مستقبل میں بھی وکلاء عدلیہ کی آزادی کے لئے بھرپور کردار اداکریں گے۔ اس موقع پر بار کے جنرل سیکریٹری عبدالحامد بھرگڑی، سینئر وکلاء عبدالغفور بھرگڑی، عبدالرزاق سومرو، سرفراز خان جتوئی، شاہد حسین قریشی اور دیگر نے بھی خطاب کیا۔