سندھ حکومت نے ستائیس دسمبر کو بینظیر بھٹو کی پہلی برسی کے موقع پر عام تعطیل کا اعلان کیا ہے اور وفاقی حکومت کو تجویز پیش کی ہے کہ اس روز ملک بھر میں چھٹی کا اعلان کیا جائے۔
صوبائی کابینہ کے اجلاس میں منگل کو فیصلہ کیا گیا کہ صوبے میں ہر سال ستائیس دسمبر کو عام تعطیل کی جائے گی اور قومی جھنڈہ سرنگوں رہے گا۔

کابینہ کے اجلاس کے بعد صوبائی وزیر اطلاعات شازیہ مری نے میڈیا بریفنگ میں بتایا کہ حکومت چاہتی ہے کہ صوبے میں اسلحہ کی موجودگی کو کم سے کم کیا جائے اور یہ قدم عوام کے تحفظ اور بہتری کے لئے اٹھایا جاہا ہے۔

’جو اسلحہ لائسنس یافتہ ہے اس کی بھی رجسٹریشن اور تصدیق ہوگی تاکہ یہ ہر تھانے کو یہ پتہ چل سکے کہ علاقے میں کتنے ہتھیار موجود ہیں اور وہ کس نوعیت کے ہیں۔‘

شازیہ مری کا کہنا تھا کہ کراچی میں ہر علاقے میں ناظم اور پولیس حکام سروے کریں گے جس کے بعد غیرقانونی طور پر کھڑی کی گئیں رکاوٹیں ہٹا دی جائیں گی اور جہاں پر چوکیداری کے لئے یہ رکاوٹیں لگائی گئی ہیں انہیں برقرار رکھا جائے گا۔

ان کے مطابق غیرقانونی طریقے سے کچھ رکاوٹیں کھڑی کی گئی ہیں جن کی کوئی اجازت حاصل نہیں کی گئی ہے، جہاں عام لوگوں کی نقل و حرکت کو محدود کردیا جاتا ہے اس قدر کہ پولیس کو بھی وہاں پہنچے میں تاخیر ہوتی ہے۔
دوسری جانب صوبائی حکومت میں شامل متحدہ قومی موومنٹ کے سربراہ الطاف حسین نے محکمہ داخلہ کے اس فیصلے پر سخت رد عمل کا اظہار کرتے ہوئے اسے کراچی کے لوگوں سے ناانصافی قرار دیا ہے۔

اپنے ایک بیان میں الطاف حسین نے کہا ہے کہ کراچی کے عوام نے جرائم سے تنگ آکر اپنے محلوں اور علاقوں میں حفاظتی بیریئرز لگائے تھے، ان علاقوں میں پولیس، رینجرز یا کسی کو بھی آنے جانے میں کوئی رکاوٹ نہیں ہے۔

ان کا یہ بھی کہنا ہے کہ پورے ملک کے شہریوں کوحفاظت کے لئے اسلحہ لائسنس دیئے جاتے ہیں لیکن کراچی کے شہریوں سے ان کا لائسنس والا اسلحہ واپس لینے کی بات کی جا رہی ہے۔

متحدہ قومی موومنٹ کے صوبائی وزیر رضا ہارون کا کہنا ہے کہ صوبائی کابینہ کے اجلاس میں اس معاملے پر کوئی بحث نہیں ہوا۔

’ہمارا یہ موقف ہے کہ یہ رکاوٹیں کسی جماعت نے نہیں کھڑی کی ہیں، بلکہ عوام نے اپنی مدد آپ کے تحت قائم کی ہیں جس وجہ سے شرح جرائم میں کمی ہوئی ہے اور یہ ایک اچھی چیز ہے اگر حکومت چاہتی ہے تو اس کا کوئی نظام واضح کردیا جائے۔‘

یاد رہے کہ کراچی میں حالیہ ہنگاموں کے بعد صوبائی حکومت نے شہر کے مختلف علاقوں میں کھڑی کی گئی رکاوٹیں ختم کرانے کا اعلان کیا تھا اور لوگوں کو ہدایت کی تھی کہ وہ متعلقہ تھانوں پر غیرقانونی اسلحہ جمع اور لائسنس یافتہ اسلحہ رجسٹرڈ کرائی۔

کئی سیاسی جماعتوں کا یہ موقف رہا ہے کہ شہر کے کچھ علاقوں میں نو گو ایریاز قائم ہیں جن میں مخالفین کو جانے کی اجازت نہیں ہے۔

دوسری جانب محکمہ داخلہ نے حالیہ ہنگامہ آرائی کی تحقیقات کے لئے قائم کیے گئے ٹریبونل کا نوٹیفکیشن جاری کردیا ہے۔ یہ ٹریبونل ایک ماہ کے اندر ان واقعات کی وجوہات، ذمہ دار عناصر اور حفاظتی انتظامات میں کمی بیشی کی نشاندہی کرے گا اور آئندہ کے لئے تجاویز پیش کرے گا۔

__________________