بینظیر کی شہادت بہت بڑا نقصان ہے، الطاف حسین کی آصف زرداری سے تعزیت



لندن (پ ر) متحدہ قومی موومنٹ کے قائد الطاف حسین نے پاکستان پیپلزپارٹی کے کو چیئرمین آصف علی زرداری کو فون کر کے محترمہ بینظیر بھٹو کی شہادت پر دلی تعزیت اور افسوس کا اظہار کیا۔ اس موقع پر الطاف حسین نے کہاکہ محترمہ بینظیر بھٹو کی شہادت سے ملک و قوم کا بہت بڑا نقصان ہوا ہے، جس پر مجھ سمیت متحدہ قومی موومنٹ کا ایک ایک کارکن غمزدہ ہے۔ انہوں نے آصف علی زرداری سے کہاکہ میری تعزیت پیپلزپارٹی کے ایک ایک کارکن تک پہنچا دیں اور محترمہ بینظیر بھٹو کے تینوں بچوں بلاول بھٹو زرداری، بختاور بھٹو زرداری، آصفہ بھٹو زرداری اور دیگر اہل خانہ تک بھی میری تعزیت پہنچا دیں۔ الطاف حسین نے دعا کی کہ اللہ تعالیٰ محترمہ کی مغفرت کرے اور ان کے لواحقین اور کارکنان کو صبر جمیل عطا کرے۔ اس موقع پر الطاف حسین نے کہاکہ ماضی میں ہمیں سازشوں کے ذریعے لڑوایا گیا لیکن اب جب کہ ہم ماضی کی سازشوں کو سمجھ چکے ہیں تو وقت آ گیا ہے کہ ہم ان عناصر اور قوتوں کو پہچانیں جو سندھ میں سیاسی قوتوں کو آپس میں لڑواتی رہی ہیں۔ اب ہمیں مل جل کر سندھ اور ملک کی ترقی کے لئے کام کرنا چاہئے اور ملک کو بچانے کے لئے مل جل کر کوششیں کرنی چاہئیں۔ آصف علی زرداری نے تعزیت کرنے پر الطاف حسین کا دلی شکریہ ادا کیا اور کہا کہ میں آپ کی تعزیت اپنے اہل خانہ اور پارٹی کارکنوں تک ضرور پہنچاؤں گا۔ انہوں نے الطاف حسین سے کہا میں آپ کی باتوں سے مکمل اتفاق کرتا ہوں کہ ماضی میں غلط فہمیاں پیدا کرکے ہمیں آپس میں لڑوایا گیا، ہم اور آپ مل جل کر سندھ اور ملک کے لئے کام کریں گے۔ آصف زرداری نے الطاف حسین سے کہاکہ آپ کے دل نے جس طرح ہمارے درد اور غم کو محسوس کیا ہے، اس سے میں بہت متاثر ہوا ہوں۔