اسلام آباد (عمر چیمہ)معزول چیف جسٹس افتخار محمد چوہدری نے اس الزام کو سختی سے مسترد کردیا ہے کہ وہ صدر پرویز کو غیرقانونی طور پر برطرف کرنے کی کوشش کررہے تھے‘ اس سے پہلے صدر پرویز مشرف نے منگل کو ایک غیرملکی ٹی وی چینل کو انٹرویو کے دوران کہا تھا کہ سابق چیف جسٹس انہیں غیرقانونی طور پر برطرف کرنے کی کوشش کررہے تھے اور اگر ہم انہیں اس راہ پر چلنے کی اجازت دیتے تو ملک کو مشکل صورتحال درپیش ہوتی۔ صدر پرویز مشرف نے استفسار کیا کہ اگر ہم اس چیف جسٹس (افتخار چو ہدری) کو ان کے راستے پر چلنے دیتے تو ملک کن حالات سے دوچار ہوتا؟ اپنے استفسار کا جواب دیتے ہوئے صدر پرویز مشرف نے کہا کہ اگر ایسا ہوتا تو ہم ملک کو انتشار کی طرف لے جاتے۔ صدر پرویز مشرف کے اس تبصرے پر معزول چیف جسٹس کی جانب سے منگل کی رات فوری ردعمل کا اظہار کیا گیا ہے۔ جسٹس افتخار چوہدری نے صدر پرویز کے اس بیان کو ”بالکل غلط“ قرار دیا ہے اور کہا ہے کہ ان (صدر پرویز) کے اس دعوے کو بالکل بے بنیاد ثابت کرنے کیلئے صرف یہی ایک نکتہ کافی ہے کہ ان (صدر پرویز) کے کیس کی سماعت کرنے والے 11 رکنی بینچ کے وہ ممبر ہی نہیں تھے۔ چوہدری افتخار کا کہنا ہے کہ اس 11رکنی بینچ کے 4 جج پہلے ہی ان (صدر پرویز) کی وفاداری کا حلف اٹھاچکے ہیں۔ افتخار چوہدری نے کہا ہے کہ ان کے پاس بے نقاب کرنے کیلئے کئی راز ہیں اوروہ جب مناسب سمجھیں گے تو ایسا کریں گے۔ ایک معتمد خاص کے ذریعہ بھیجے گئے بیان میں جسٹس افتخار چوہدری نے کہا کہ موجودہ عدالتی نظام میں ہر جج تمام ایشوز پر اپنا موقف رکھنے میں آزاد ہے۔ افتخار چوہدری نے استفسارکیا کہ جب وہ اس 11 رکنی بینچ کا حصہ ہی نہیں تھے تو وہ صدر (پرویز) کو کس طرح عہدے سے برطرف کرنے کی کاروائی کرسکتے تھے۔ جسٹس افتخار چوہدری کا کہنا ہے کہ پرویز مشرف اپنے 3 نومبر کے اقدامات کو جواز فراہم کرنے کیلئے مختلف موقف اختیار کررہے ہیں اور ان (جسٹس افتخار چوہدری) کے پاس غیرقانونی حراست سے رہائی کے بعد انکشاف کرنے کیلئے بہت کچھ ہے۔ واضح رہے کہ جسٹس افتخار چوہدری3 نومبر کو نافذ کی جانے والی ایمرجنسی کے نفاذ سے اب تک زیرحراست ہیں اور پی سی او کے تحت حلف اٹھانے سے انکار کرنے والے تمام ججز کو برطرف کردیا گیا ہے۔ تقریباً 50 ججوں نے پرویز مشرف کی وفاداری کا حلف اٹھانے سے انکار کیا ہے۔

__________________