09 نومبر 2010
خیرپور(مانیٹرنگ ڈیسک)مسلم لیگ ن کے قائد میاں نواز شریف نے کہا ہے کہ جمہوریت گھوڑا اور مارشل لاءگدھا ہے اور منزل تک پہنچنے کیلئے کبھی گھوڑے کی اور کبھی گدھے کی سواری کی جارہی ہے لیکن تاحال منزل تک نہ پہنچ سکے۔خیرپور میں ایک جلسے سے خطاب کرتے ہوئے اُنہوں نے کہا کہ مارشل لاءلگانے والوں کوملک کی عزت راس نہیں آتی۔نواز شریف نے کہا کہ حکومت ہر روز ایک مسئلہ کھڑا کرتی ہے اور ججز سے لڑائی کرتی ہے لیکن اب فیصلے تسلیم کرنے ہونگے۔اُنہوں نے اعلان کیا کہ وہ حکومت کے اُن تمام اقدامات کی بھرپور مخالفت کریں گے جس کے نتیجے میں کرپشن بڑھے، مہنگائی ہو اور عوام کے ساتھ زیادتی ہو۔ اُنہوں نے کہا کہ وہ حکومت کو مجبور کرینگے کہ وہ پاکستان کے حق میں صحیح فیصلے کرے۔نواز شریف نے کہا کہ وہ 80اور90کی دہائی کی سیاست دوبارہ شروع کرنا نہیں چاہتے لیکن افسوس کہ حکومت نے ماضی سے کوئی سبق نہیں سیکھا۔اُنہوں نے کہا کہ وہ صدر زرداری کے ساتھ ملکرکام کرناچاہتے تھے اور زرداری صدربنے توسب سے پہلے اُنہوں نے آصف زرداری کو مبارکباددی لیکن اُن کی محنت پر پانی پھیر دیا گیا۔نواز شریف نے کہا کہ ملک میں بجلی نہیں ہے لیکن پھربھی مہنگی کی جارہی ہے ،اور تو اور روزنت نئے ٹیکس لگائے جارہے ہیں جس سے غریب کی حالت بدسے بدترہورہی ہے۔اُنہوں نے کہا کہ میثاق جمہوریت پر بینظیر کے ساتھ دستخط کیے لیکن زرداری صاحب نے عمل نہیں کیا۔اُن کا کہنا تھا کہ پرویزمشرف کوگارڈآف آنردینے پراُنہیں افسوس ہوا تھا۔نواز شریف نے کہا صدر زرداری کویہ معلوم نہیں کہ اُن دوست کون ہے اوردشمن کون۔ اُنہوں نے کہا کہ آج حالت یہاں تک پہنچ چکی ہے کہ حکومت کی ناکامی کوعوام جمہوریت کی ناکامی قراردے رہے ہیں اوراُنہیںموقع ملا تو سفر دوبارہ وہیں سے شروع کریں گے جہاں سے چھوڑا تھا۔ اُنہوں نے مطالبہ کیا کہ چینی کی بلیک مارکیٹنگ کرنیوالوں کیخلاف کارروائی کی جائے۔

__________________
جاویداسد