خود ساختہ جلا وطن سابق وزیرِ اعظم بے نظیر بھٹو کی 18اکتوبر کو پاکستان واپسی کا اعلان اُن کی جماعت کے پارلیمانی لیڈر مخدوم امین فہیم نے اسلام آباد میں ایک پُرہجوم پریس کانفرنس میں کیا۔



اُنھوں نے جونہی یہ اعلان کیا، پیپلز پارٹی سینٹرل سیکریٹریٹ میں موجود سینکڑوں سیاسی کارکنوں نے پُر جوش نعرے لگانا شروع کر دیے اور ہوائی فائرنگ کے ساتھ ساتھ آتش بازی کا مظاہرہ بھی شروع کر دیا۔



مخدوم امین فہیم نے بتایا کہ محترمہ بھٹو آٹھ سال کی جلا وطنی کے بعد 18اکتوبر کو کراچی کے بین الاقوامی ہوائی اڈے پر اُتریں گی جہاں سے وہ ایک جلوس کی شکل میں قائدِ اعظم کے مزار پر حاضری کے لیے روانہ ہوں گی۔



امین فہیم نے اِس تاثر کو رد کیا کہ وطن واپسی پر بے نظیر بھٹو کو گرفتار کیا جا سکتا ہے، کیوں کہ اُن کے خلاف احتساب عدالت کی طرف سے مقدمے سے غیر حاضری پر گرفتاری کے وارنٹ جاری کیے گئے ہیں۔



اِس حوالے سے پوچھے گئے ایک سوال کا جواب دیتے ہوئے مخدوم امین فہیم نے کہاکہ عدالت نے یہ مقدمہ ختم کر دیا تھا۔


وفاقی وزیرِ مملکت برائے اطلاعات طارق عظیم نے ایک بیان میں کہا ہے کہ حکومت کو بے نظیر بھٹو کی وطن واپسی پر کوئی اعتراض نہیں۔ البتہ اُن کے بقول وطن واپسی پر محترمہ بھٹو کو اپنے خلاف بد عنوانی کے مقدمات کا سامنا کرنا پڑے گا۔

VOA News

__________________