مسلح عسکریت پسندوں نے ماشوخیل کے علاقے سے 14 پیسکو اہلکاروں اور مزدوروں کو منگل کے روز ٹریکٹر ٹرالی سمیت یرغمال بنا لیا۔ ان میں تین لائن مین اور 11 مزدور شامل تھے جو کہ چند روز پہلے اڑائے جانے والے ٹاوروں کی مرمت کرنے آئے تھے۔ بھاری ہتھیاروں سے مسلح عسکریت پسندوں نے وہاں پہنچ کر انھیں اغوا کیا اور خاموشی سے خیبر ایجنسی کے علاقے میں منتقل کر دیا۔

جب دہشت گرد ان بیچارے مزدوروں کو جو کہ دوسروں کو ایک سہولت مہیا کرنے آئے تھے کو خاموشی سے بیٹھا کر لے جا رہے تھے تو انھیں شاید یہ احساس نا ہوا ہو، کہ ان مزدوروں کے گھروں میں کوئی انکے لوٹنے کا انتظار کر رہا ہے۔ شاید انکی ماوں، بہنوں یا بچوں میں سے کسی کے دل کو یونہی دھچکا لگا ہو، یا کسی کی آنکھ یونہی پھڑکی ہو کہ انکے پیارے مصیبت میں گھر چُکے ہیں۔ جب یہ شدت پسند گاڑی میں سوار ہوئے تو شاید انھوں نے یہ نا سوچا ہو کہ کوئی انکے اپنے گھروں میں بھی انکے لوٹنے کا انتظار کر رہا ہے۔