بے نظیر کو دھاندلی کے ثبوت دینے سے چند گھنٹے پہلے قتل کیا گیا،پیپلز پارٹی



اسلام آباد(جنگ نیوز) پیپلز پارٹی کے رہنما سینیٹر لطیف کھوسہ نے دعویٰ کیا ہے کہ بے نظیر بھٹو کو جس وقت شہید کیا گیا، وہ اس کے چند گھنٹے بعد انتخابات میں مبینہ دھاندلی کے لئے آئی ایس آئی اور الیکشن حکام کے منصوبے کے ثبوت میڈیا کو دینے والی تھیں۔ انہوں نے اس بارے میں ایک رپورٹ تیار کی تھی جو انہوں نے جمعرات کی شام امریکی ارکان کانگریس سے ملاقات میں انہیں دینے کے بعد پریس کانفرنس میں جاری کرنا تھی لیکن وہ ایسا نہ کر سکیں،دوسری جانب صدارتی ترجمان راشد قریشی نے ان دعووں کو مضحکہ خیز قرار دیا ہے۔تفصیلات کے مطابق لطیف کھوسہ نے بتایا کہ جمہوریت کے چہرے پر ایک اور دھبہ کے عنوان سے 160صفحات کی رپورٹ انہوں نے لکھی تھی ۔ انہوں نے کہا کہ منصوبے پر سابق حکومتوں کے اشتراک سے پہلے ہی عمل شروع ہو گیا تھا۔ ریٹرننگ آفیسرز پر دباؤ ڈال کر امیدواروں کے کاغذات نامزدگی مسترد کروائے گئے۔ بعض امیدواروں کو کاغذات جمع نہیں کرانے دیئے گئے انہوں نے دعویٰ کیا کہ آئی ایس آئی کے پاس ایک میگا کمپیوٹر ہے جو کسی بھی کمپیوٹر کو ہیک کر سکتا ہے اس کا کنکشن الیکشن کمیشن کے سسٹم سے ہے۔ الیکشن کمیشن پوری طرح حکومت کے ماتحت ہے۔ صدر کے ترجمان راشد قریشی نے ان دعوؤں کو مضحکہ خیز قرار دیا ہے انہوں نے کہا کہ ان دعوؤں پر ہنسی آتی ہے،کیونکہ صدر نے کہا ہے کہ آزادانہ، منصفانہ شفاف اور پرامن الیکشن ضروری ہے۔