بے نظیر کے سر کے زخم کو سن روف کا لیور لگنے کا نتیجہ قرار نہیں دیا‘ پروفیسر مصدق



اسلام آباد (جنگ نیوز) راولپنڈی میڈیکل کالج کے پرنسپل پروفیسر محمد مصدق خان نے اس خبر کی تردید کی ہے جس میں ان سے یہ بیان منسوب کیا گیا ہے کہ محترمہ بے نظیر بھٹو اپنی کار کے سن روف کا لیور لگنے سے جاں بحق ہوئیں۔ تردیدی بیان میں انہوں نے کہا کہ یہ بیان قطعی طور پر غلط‘ گمراہ کن‘ شرانگیز اور بے بنیاد طور پر ان سے منسوب کیا گیا ہے۔ انہوں نے واضح کیا کہ ایک آفیشل رپورٹ جاری کی گئی تھی جس میں محترمہ کو آنے والے زخم کے کلینیکل ایگزامینیشن کا تذکرہ تھا، تاہم یہ زخم کا تفصیلی پوسٹ مارٹم نہیں تھا اور رپورٹ میں کسی بھی جگہ انہوں نے زخم کے سبب کے بارے میں ذاتی حیثیت میں کوئی رائے نہیں دی۔ اس معاملے کی وضاحت آر ایم سی کے بورڈ آف مینجمنٹ کے رکن اطہر من الله کی جانب سے بھی کی جاچکی ہے۔ انہوں نے کہا کہ وہ اپنا یہ قانونی حق محفوظ رکھتے ہیں کہ غلط طور پر ان سے منسوب بیان کی اشاعت سے جو نقصان پہنچا ہے، اس کے ازالے کے لئے ضروری اقدام کریں۔