ترکمانستان افغانستان پاکستان گیس پائپ لائن منصوبہ امریکی کمپنی آئی او سی کو دینے کی منظوری دے دی گئی:
اسلام آباد (ٍٍاردوپوائنٹ) حکومت پاکستان نے ترکمانستان اور افغانستان کے راستے پاکستان تک تیل اور گیس کی پائپ لائن بچھانے کا منصوب امریکی کمپنی آئی او سی کو دینے کی منظوری دے دی ہے ۔ کمپنی کے ترجمان کی طرف سے جاری ہونے والے بیان میں بتایا گیا ہے کہ اس منصوبے پر جلد ہی کام شروع کردیا جائیگا ۔ اس ضمن میں باقاعدہ سمجھوتوں کو حتمی شکل دی جارہی ہے ۔ 2200 کلو میٹر طویل تیل و گیس پائپ لائن کے ذریعے ترکمانستان کے علاقے دولت آباد سے پاکستان میں محمود آباد  مظفر گڑھ تک تیل اور گیس پہنچائے جائیں گے جہاں سے انہیں ملک بھر میں سپلائی کیا جائیگا اس گیس پائپ لائن پر دس ارب ڈالر خرچ ہوں گے اور یہ منصوبہ تین سال میں مکمل ہوگا ۔ کمپنی کے مطابق سمجھوتے کے مطابق دو آئل ریفائنریاں اور ایک ایک ہزار میگ واٹ کے چار بجلی گھر بھی تعمیر کئے جائیں گے جن سے ملک میں بجلی کی پیداوار بڑھے گی اور لوڈ شیڈنگ کم کرنے میں مدد ملے گی اس پائپ لائن کے ذریعے روزانہ دوملین بیرل تیل اور 4ارب مکب فٹ گیس فراہم ہوگی ۔کمپنی کے مطابق ملک میں پہلی مرتبہ جے پی ون اور جے پی فور ایندھن تیار کرنے کیلئے ریفائنری بھی لگائی جائے گی جس سے ملک کو زرمبادلہ کی بچت ہوگی ۔بیان کے مطابق افغانستان میں سکیورٹی اور انشورنس ضمانت کے معاملات طے کرلئے گئے ہیں اور توقع ہے کہ جلد ہی گیس پائپ لائن کیلئے سمجھوتے پر دستخط ہوں گے ۔

__________________