اسلام آباد (جنگ نیوز) ترکی کے صدر عبداللہ گل صدر پرویز مشرف کی دعوت پر اتوار کی شام دو روزہ سرکاری دورے پر اسلام آباد پہنچے تو ان کا پرتپاک خیر مقدم کیا گیا۔ صدر پرویز مشرف نے چکلالہ ایئربیس پر معزز مہمان کا استقبال کیا۔ خاتون اوّل بیگم صہبا پرویز مشرف ‘ وزیر خارجہ انعام الحق ‘ پاکستان میں ترکی کے سفیر انگین سوئسل اور دیگر اعلیٰ حکام بھی ہوائی اڈے پر موجود تھے۔ اس موقع پر ترک صدر کو 21 توپوں کی سلامی دی گئی جبکہ پاک فضائیہ کے ایک چاک و چوبند دستے نے انہیں گارڈ آف آنر پیش کیا۔ خاتونِ اوّل خیر النّساء گل ‘اعلیٰ حکام‘ تاجر رہنما اور ذرائع ابلاغ کے سرکردہ نمائندے بھی اس دورے میں ترک صدر کے ہمراہ ہیں۔ ترک صدر کے دورے کا مقصد دونوں برادر ممالک کے درمیان دو طرفہ اور دوستانہ تعلقات کو مزید فروغ دینا ہے۔ ان کا یہ دورہ پاکستان اور ترکی کے درمیان سفارتی تعلقات کے قیام کی 60ویں سالگرہ کے موقع پر ہو رہا ہے۔ ترک صدر اپنے قیام کے دوران (آج) ایوان صدر میں صدر پرویز مشرف کے ساتھ دو طرفہ علاقائی اور عالمی اہمیت کے معاملات پر تبادلہ خیال کریں گے۔ صدر مشرف ترک صدر کے اعزاز میں ضیافت اور نگران وزیر اعظم ان کے اعزاز میں ظہرانہ دیں گے۔

__________________