کراچی: صفدر عباس نقوی کی آج ٹی وی رپورٹ کے مطابق پاکستان میں گزشتہ تریسٹھ برسوں میں ایک ایک اینٹ کر کے جو معاشی ڈھانچہ کھڑا کیا گیا تھا،حالیہ سیلاب نے گھڑی بھر میں اسے تباہ و برباد کر دیا۔کسی بھی ملک کی معیشت کا انحصار اس کی زراعت اور صنعت و حرفت کے شعبوں پر ہوتا ہے۔ اگر کھیت سوکھ جائیں اور صنعتی پہیہ رک جائے تو ترقی خواب بن جاتی ہے۔ آزادی کی نعمت ملنے کے بعد پاکستان کو ان گنت مشکلات کا سامنا کرنا پڑا۔ سن انیس سو سینتالیس میں پاکستان میں کل چونتیس چھوٹے اور درمیانے درجے کے کارخانے تھے، جن میں محنت کشوں کی مجوعی تعداد چھبیس ہزار چار سو تھی۔ صرف دو سال کے قلیل عرصے میں مجموعی قومی پیداوار میں صنعتی شعبے کا حصہ سات فیصد ہوگیا۔

صنعتی منصوبہ بندی کے تحت انیس سو پچاس میں چھ سالہ منصوبہ وضع کیا گیا، جسے کولمبو پلان بھی کہا جاتا ہے۔ اسی منصوبے کے تحت انیس سو باون میں پاکستان انڈسٹریل ڈیولپمنٹ کارپوریشن قائم کی گئی اور اگست انیس سو اکسٹھ میں پاکستان صنعتی ترقیاتی بینک قائم کیا گیا۔انیس سو ساٹھ اور ستر کی دہائی میں چھوٹی صنعتوں پر توجہ دے کر معاشی ترقی کی بنیاد رکھی گئی، حکومت نے انیس سو ستاون میں آزادانہ درآمدی لائسنس کی پالیسی ختم کر کے ملکی پیداوار میں اضافے کے لئے اشیائے سرمایہ اور خام مال کی درآمد کے لئے نرم پالیسی اختیار کی۔ جس سے صنعتی پہیہ تیزی کے ساتھ گھوما لیکن ابھی صنعتی ترقی کا عمل شروع ہی ہوا تھا کہ انیس سو باہتر میں حکومت نے صنعتوں کو قومی تحویل میں لے لیا جس سے معاشی ترقی پر کاری ضرب لگی۔

پاکستان جیسے ترقی پزیر ملک میں صنعتوں کی اہمیت سے انکار نہیں کیا جاسکتا۔ تریسٹھ سال گزرنے کے بعد جی ڈی پی میں صنعتوں کا حصہ چھبیس فیصد، برآمدات میں ترپن فیصد اور روزگار کی فراہمی میں تریسٹھ فیصد ہے۔ اگرچہ ملکی ترقی میں صنعت کے کردار کو فراموش نہیں کیا جاسکتا لیکن آج بھی اس شعبے کو مضبوط بنانے کے لئے مثبت پالیسیوں کی ضرورت ہے۔

__________________
جاویداسد