لاہور(نامہ نگار خصوصی) وفاقی وزیر قانون بابر اعوان نے کہا ہے کہ پیپلز پارٹی تعلیمی اداروں کی نجکاری کسی صورت نہیں ہونے دیگی ،تعلیمی اداروں کو فاونڈری سمجھ کر ان پر قبضے کی کوشش کامیاب نہیں ہونے دینگے، پنجاب میں طلباء اور اساتذہ کو اس دن لاٹھی چارج اور بربریت کا نشانہ بنایا گیا جس روز پنجاب سمیت پوری دنیا میں انسانی حقوق کا عالمی دن منایا جا رہا تھا اور اس دوران محرم الحرام جیسے مقدس مہینے کا بھی لحاظ نہیں کیا گیاجس کی پوری قوم مذمت کرتی ہے۔ ایوان عدل میں توڑ پھوڑ کے نتیجے میں ہونے والے نقصان کے ازالے کے طور پر45لاکھ اور اس واقعہ میں زخمی ہونے والے 76 وکلاء کو ایک ایک لاکھ روپے امداد دینے کا بھی اعلان کیا ۔ ان خیالات کا اظہار انہوں نے گزشتہ روز حاجی عزیز الرحمن چن کے گھر ملاقات کے لئے آنیوالے آل پاکستان ٹیچرز فیڈریشن، تعلیم بچاو تحریک، متحدہ طلباء محاذ اور دیگر تنظیموں کے مشترکہ وفد سے ملنے کے بعد پریس کانفرنس سے خطاب کرتے ہوئے کیا۔اس موقع پر مشتاق اعوان، فائزہ ملک اور دیگر بھی موجود تھے۔ ڈاکٹر بابر اعوان نے کہا کہ پارٹی کے شریک چیئرمین نے بھی اس ظلم و تشدد کی مذمت کی ہے۔انہوں نے کہا کہ پنجاب کے حکمران اس سے قبل شوگر اور پولٹری کی فاونڈری بنا چکے ہیں اور اس سے بھی پہلے بنک میاں منشا کو دیدئیے مگر ہم تعلیم اور تعلیمی اداروں میں ان کی منشا نہیں چلنے دینگے یہاں صرف طلباء اور اساتذہ کی منشا چلے گی۔ انہوں نے کہا کہ اس میں کوئی سیاست نہیں، وفاقی حکومت طلباء اور اساتذہ کیساتھ ہے،پاکستان میں مافیاز کے ذریعے تعلیم کو غریب کے ہاتھ اور گھر سے نہیں نکلنے دینگے،پیپلز پارٹی پنجاب کے تعلیمی اداروں میں ''پیدا گیر'' بورڈز برداشت نہیں کریگی۔انہوں نے کہا کہ پنجاب کے26کالجز پر قبضے کے لئے انڈر گریجوایٹ اور میٹرک پاس افراد بورڈ آف گورنرز میں لگائے جا رہے ہیں،حکمران سمجھ لیں کہ تعلیم عبادت ہے کوئی منافع نہیں وہ ہر جگہ منافع تلاش نہ کریں۔انہوں نے کہا کہ ہمیں معلوم ہے کہ شہر میں پلازے اور مارکیٹیں بنانے والوں کو بڑے بڑے گرائونڈ اور کمرے نظر آ رہے ہیں مگر ہم انہیں غریب کے بچے کے مستقبل سے نہیں کھیلنے دینگے۔انہوں نے مطالبہ کیا کہ فوری طور پر سیاسی انتقام کے طور پر کئے گئے اساتذہ کے تبادلے اور مقدمات ختم کئے جائیں۔اس موقع پر انہوں نے ایوان عدل میں توڑ پھوڑ کے نتیجے میں ہونے والے نقصان کے ازالے کے طور پر45لاکھ اور اس واقعہ میں زخمی ہونے والے 76وکلاء کو ایک ایک لاکھ روپے امداد دینے کا بھی اعلان کیا، لاٹھی گولی کی سرکار اور جمہوریت ساتھ ساتھ نہیں چل سکتے،18ویں ترمیم کے بعد طلباء یونینوں کے انتخابات کرانا صوبائی حکومتوں کی ذمہ داری ہے، ہمارا مطالبہ ہے کہ پنجاب حکومت یہ فوری طور پر کرائے اگر کوئی قانونی امداد چاہیے تو وزارت قانون حاضر ہے۔

__________________
جاویداسد