تمام انسانوں تک نبی ا کا پیغام پہنچایاجائے،پیرنصیر الدین نصیر
برمنگھم (پ ر) مرکزی علما کونسل برطانیہ و یورپین مسلم کونسل کے زیر اہتمام ادارہ فیض القرآن برمنگھم میں زیر صدارت پیر سید ارشد شاہ گیلانی جلسہ میلادالنبی ا منعقد ہوا جس سے خطاب کرتے ہوئے پیر نصیر الدین نصیر نے کہا کہ اسلام کا گلدستہ جس دھاگے سے بندھا ہے وہ رحمت دو عالم ا کا وجود مبارک ہے اس لئے ضروری ہے کہ اس وجود پاک کے سوانح کا ایک ایک حرف و عمل ہر مسلمان تک پہنچ جائے تاکہ اس کا رشتہ مضبوط سے مضبوط تر ہوتا چلا جائے اس کی مناسب صورت یہ ہے کہ ہر چھوٹے بڑے تک پیغمبر اسلام کے نام و کام اور پیغام کو عام کیا جائے۔ جماعت اہلسنت یوکے کے ناظم اعلیٰ علامہ قاری حفیظ الرحمن چشتی نے کہا کہ آج پوری دنیا میں ہر طرف انسانی حقوق کی آوار گونج رہی ہے سیاست و معاشرت، مذہب، اخلاق غرض یہ کہ زندگی کے ہر شعبہ میں انسانیت کی آواز لگائی جا رہی ہے۔ لیکن یہ حقیقت ہے کہ اس کی سب سے پہلے آواز پیغمبر اسلام نے اٹھائی۔ تنظیم المدارس اہلسنہ پاکستان کے علامہ غلام دستگیر افغانی نے کہا کہ افسوس مسلمانوں پر ہے کہ ان کی غفلت اور بدعملی نے آج اسلام اور پیغمبر اسلام کے خلاف لوگوں کو انگشت نمائی کا موقع فراہم کیا۔ مولانا پیر عبدالقادر بغداری نے کہا کہ تعجب ہے جس پیغمبر ا کی ایک آواز نے پوری انسانیت کو زندہ کیا اور پوری انسانی تاریخ پر اس کی گہری چھاپ پڑی آج اسی کے ساتھ احسان فراموشی کا ایک طویل سلسلہ جاری ہے۔ علامہ قاضی عبدالخبیر عباسی نے کہا کہ میلادالنبی ا کی محافل سے امت مسلمہ کے افراد سنت نبوی ا اور دینی احکام سے آگاہی حاصل کرتے ہیں۔ صاحبزادہ پیر محمد شعیب چشتی نے کہا کہ ہمارا بنیادی کام نوجوان نسل کی تعلیم و تربیت ہے۔ صاحبزادہ پیر دلدار علی شاہ نے کہا کہ سیرت پیغمبر اسلام ا ہی انسانیت کے لئے مشعل راہ ہے۔ صاحبزادہ محمد رفیق چشتی نے کہا کہ آج کا انسان گھوم پھر کر دروازہ اسلام پر دستک دے رہا ہے یہ اسلام کی حقانیت کی دلیل ہے۔ صاحبزادہ محمد ابوبکر چشتی نے کہا کہ دنیا میں یوم پیدائش پیغمبر پر مکمل اسلامی یکجہتی نظر آتی ہے۔ صاحبزادہ محمد عمر فیض چشتی نے کہا کہ مسلمان کی سب خوشیوں میں دل و نگاہ کی متاع عزیز خوشی آمد رسول ا ہے۔

__________________