اسلام آباد(نمائندہ جنگ) حکومت نے تمام زرعی اشیاء پر ڈیوٹی اور سیلز ٹیکس ختم کر دیا ہے جبکہ تیل، بجلی اور گیس پر سبسڈی فوری طور پر واپس لینے کی تردید کرتے ہوئے کہا گیا ہے کہ یہ سبسڈی مرحلہ وارطور پر واپس لی جائیگی،حکومت نے ٹریکٹرز، زرعی ادویات، بیج اور فاسفیٹ کھاد سمیت تمام زرعی اشیاء پر درآمدی ڈیوٹی اور سیلز ٹیکس ختم کرنے کا اعلان کیا ہے۔قومی اسمبلی نے 32 کھرب 90 ارب 61 کروڑ 18 ہزار روپے کے لازمی اخراجات کی منظور ی دیدی ہے ان کا وزارت خارجہ ، قومی اسمبلی ، سینیٹ ، ایوان صدر ، سپریم کورٹ اور الیکشن کمیشن سمیت22 وفاقی اداروں سے ہے ،آئین کے مطابق لازمی اخراجات پر قومی اسمبلی میں صرف بحث کی جاتی ہے قومی اسمبلی نے 127 مطالبات زر کی منظور ی دیدی ہے، ا رکان اسمبلی کی جانب سے بلوچستان اور این ایف سی ا یوارڈ میں صوبوں کا حصہ 50 فیصد کرنیکی سینیٹ کی 76سفارشات کی تائید کر دی ہے، وفاقی وزیر خزانہ سید نوید قمر نے جمعرات کی شام قومی اسمبلی میں نئے وفاقی بجٹ پر بحث کو سمیٹتے ہوئے کہا کہ زرعی پیداوار میں اضافے اور کاشتکاروں کو سہولتیں دینے کیلئے حکومت نے تمام زرعی اشیاء کو ڈیوٹی فری کرنے کا فیصلہ کیا ہے۔ انہوں نے کہا کہ وزیراعظم کی ہدایت پر چھوٹے زرعی قرض نادہندگان اور ہاؤس بلڈنگ کارپوریشن کے چھوٹے قرض نادہندگان کے خلاف کارروائی فوری طور پر روک دی گئی ہے اب ان کی اراضی نیلام کر کے واجبات وصول نہیں کئے جائیں گے۔ انہوں نے کہا کہ فصلوں کی انشورنس کا نظام رائج کیا جائے گا۔ بے نظیر انکم سپورٹ پروگرام کے بارے میں تحفظات دور کرنے کیلئے فیصلہ کیا گیا ہے کہ اس پروگرام میں کوئی سیاسی مداخلت نہیں ہو گی ،وزیر خزانہ سید نوید قمر نے کہا کہ بجلی اور تیل پر سبسڈی فوری طور پر ختم نہیں کی جا رہی ہے بلکہ مراحلہ وار اتنی سبسڈی ختم کریں گے جتنا عوام برداشت کر سکیں۔ پیٹرولیم مصنوعات آئیل مارکیٹنگ کمپنیوں، ڈیلرز کے منافع کم کرنے اور ڈیمڈ ڈیوٹی ختم کرنے پر غور کیا جائے گا۔ فنانس بل سے دس ایکٹ نکال دیئے جائیں گے اس میں 6پر فیصلہ ہو چکا ہے باقی پر غور جاری ہے۔ وزیر خزانہ نے کہا کہ چھوٹے زرعی قرضوں اور ہاؤس بلڈنگ فنانس کارپورشن کے ڈیفالٹرز کی زمینیں نیلام کرنے سے روک دیا گیا ہے فصلوں کی انشورنس لازمی قرار دی جائے گی بے نظیر انکم سپورٹ فتڈ میں کسی قسم کی سیاسی مداخلت نہیں ہونے دی جائے گی ان کا کہنا تھا کہ موبائل فون کی درآمد کی حوصلہ شکنی کیلئے ملک کے اندر موبائیل فون تیار کرنے کی صنعت لگانے کی حوصلہ افزائی کی جائے گی۔ وزیر خزانہ نے کہا کہ ٹیکسٹائل کے شعبہ کیلئے ریسرچ اینڈ ڈویلپمنٹ سپورٹس فنڈ کی سہولت برقرار رکھا جائے گی تاہم اس کے لئے شعبوں کی نشاندہی کی جائے گی۔ افراط زر کو جادو سے ختم نہیں کر سکتے بجٹ میں ایسے شعبوں پر ٹیکس لگائے گئے ہیں جن کا تعلق امراء سے ہے مسائل کو ایگزیکٹو آڈر سے حل نہیں کر سکتے اس کیلئے سخت محنت کرنا ہو گی۔قومی اسمبلی نے جمعرات کو مالی سال 2008-09 کیلئے مختلف وفاقی وزارتوں‘ ڈویژنوں اور ان کے ماتحت وفاقی داروں کیلئے 127 مطالبات زر کی کثرت رائے سے منظوری دے دی۔ زبانی ووٹ کے ذریعے حکمران اتحاد میں شامل جماعتوں کے اراکین نے مطالبات زر کی حمایت کی جبکہ اپوزیشن اراکین نے مخالفت کی۔ ایک مرحلے پر اپوزیشن نے جب زبانی ووٹ کو چیلنج کیا تو سپیکر نے گنتی کرانے کا حکم دیا۔ گنتی میں حزب اقتدار کے 123 اور اپوزیشن کے 32 ارکان موجود تھے۔ امور خارجہ‘ دفاع‘ خزانہ اور اقتصادی امور‘ اطلاعات و نشریات‘ ہاؤسنگ اور تعمیرات‘ کشمیر اور شمالی علاقہ جات کے امور‘ محنت اور افرادی قوت‘ بلدیات اور دیہی ترقی اقلیتی امور‘ انسداد منشیات‘ سینیٹ‘ قومی اسمبلی‘ قومی ثقافت‘ شماریات‘ ماحول‘ نجکاری و سرمایہ کاری‘ بندرگاہیں اور جہاز رانی‘ ریلوے‘ مذہبی امور‘ سائنس اور ٹیکنالوجی‘ ریاستیں و شمالی علاقے‘ خصوصی تعلیم‘ بہبود آبادی‘ سماجی بھلائی‘ فاٹا‘ ٹیکسٹائل انڈسٹریز‘ سیاحت‘ ترقی خواتین‘ نوجوانوں کے امور‘ مواصلات‘ انفارمیشن ٹیکنالوجی اور ٹیلی کام‘ قانون اور انصاف‘ پٹرولیم اور قدرتی وسائل کی وزارتوں کیلئے مطالبات زر کی منظوری دی گئی۔ مجموعی طور پر 179 مطالبات زر ہیں اور باقی 52 مطالبات زر پر آج (جمعہ کو) بحث کی جائے گی۔ ان کا تعلق آٹھ وزارتوں سے ہے۔ آٹھ وزارتوں کے مطالبات زر پر اپوزیشن کی کٹوتی کی تحریکیں آج قومی اسمبلی میں زیر غور لائی جائیں گی۔