لاہور(جنگ نیوز) مسلم لیگ (ن) کے صدر شہباز شریف نے کہا ہے کہ بے نظیر اور فضل الرحمن سے ہونے والی بات چیت کا حتمی فیصلہ نواز شریف کا ہو گا۔ تمام سیاسی جماعتیں ایک ایجنڈے پر متفق ہو جائیں تو خوشی ہو گی۔ نجی ٹی وی سے گفتگو کرتے ہوئے انہوں نے کہا کہ کاغذات نامزدگی مسترد کرنے کے خلاف وہ اپیلیں دائر نہیں کریں گے اور نہ ہی پی سی او کے تحت حلف اٹھانے والے ججوں کی عدالت میں پیش ہوں گے۔ انہوں نے کہا کہ مولانا فضل الرحمن اور بے نظیر بھٹو سے ہونے والے مذاکرات کا حتمی فیصلہ میاں نواز شریف ہی کریں گے اور وہ جو فیصلہ بھی کریں گے اے پی ڈی ایم کو قبول ہو گا۔ انہوں نے کہا کہ تمام سیاسی جماعتیں ایک ایجنڈے پر متفق ہو جائیں تو بہت خوشی ہو گی۔ انہوں نے کہا کہ وقت کا تقاضا ہے کہ ملک کو بچانے اور آئین اور ججوں کی بحالی کے لئے سب مل کر جدوجہد کریں۔