کراچی (پ ر) ایسوسی ایشن آف ٹی وی جرنلسٹس پاکستان (اے ٹی جے) اور پاکستان براڈ کاسٹر ایسوسی ایشن (پی بی اے) نے حکومت سے مطالبہ کیا ہے کہ فوری طور پر پیمرا ترمیمی آرڈیننس 2007ء واپس لیا جائے اور تمام ٹی وی چینلز کی نشریات فوری طور پر بحال کی جائیں۔ اے ٹی جے کے ایک وفد نے پی بی اے کے عہدیداروں سے ملاقات کی اور انہیں موجودہ صورتحال میں تحفظات اور خدشات سے آگاہ کیا۔ دونوں تنظیموں نے ملک کی موجودہ صورتحال پر تشویش کا اظہار کیا۔ پی بی اے نے صحافی کارکنوں کی جدوجہد کی مکمل حمایت کی اور تعاون کا یقین دلایا جبکہ اے ٹی جے نے چینل مالکان کو سنگین نتائج کی دھمکیاں ملنے کی شدید مذمت کی۔ قبل ازیں ایسوسی ایشن آف ٹی وی جرنلسٹس پاکستان کے ایک اجلاس میں پی ایف یو جے کی جانب سے ملک میں احتجاجی تحریک شروع کرنے کے فیصلے کی حمایت کی گئی۔ اجلاس میں گورنر سندھ سے مطالبہ کیا گیا کہ کراچی سمیت سندھ بھر میں صحافیوں کے خلاف قائم مقدمات فوری طور پر واپس لئے جائیں۔ اجلاس میں فیصلہ کیا گیا کہ کسی صورت آزادی صحافت پر قدغن برداشت نہیں کی جائے گی۔

__________________