عالمی صحت کے ادارے ڈبلیو ایچ او نے دنیا کی سبھی حکومتوں سے کہا ہے کہ وہ تمباکو کے اشتہارات پر پابندی عائد کریں۔
ادارے کی جانب سے یہ اپیل اقوام متحدہ کی ایجنسی کی جانب سے تمباکو نوشی کے خلاف مقررہ دن کے موقع پر کی گئی ہے۔ دنیام میں 31 مئی اینٹی سموکنگ ڈے کے طور پر منایا جاتا ہے۔

عالمی ادارے صحت نے کہا کہ اب تک تمباکو نوشی کو روکنے کے لیے جو اقدامات کیے گئے ہیں وہ ناکافی ہیں اور ان سے ان نوجوانوں کو نہيں بچایا جا پا رہا ہے جو تمباکوں کے پروڈکٹس بنانے والی کمپنیوں کی جانب سے نئی نئی مارکٹنگ حکمت عملی کا شکار ہو رہے ہیں۔

خبر رساں ایجنسی اے ایف پی کے مطابق ڈبلیو ایچ او کے تمباکو نوشی روکنے سے متعلق ڈائرکٹر ڈگلس بیچر کا کہنا ہے ’ تمباکو کے پروڈکٹس بنانے والی کمپنیاں اس قسم کے اشتہارات بنا رہی ہیں جو نوجوانوں کو منشیات کا عادی بنانے میں مدد فراہم کرتے ہیں۔‘
انہوں نے مزید کہا کہ تمباکو کی کمپنیاں خاص طور پر ترقی پذیر ممالک کو اپنا نشانہ بنا رہی ہیں اور ان میں بھی ان لڑکیوں پر زیادہ توجہ دی جا رہی ہے جنہوں نے نئی نئی تمباکونوشی شروع کی ہے۔

2005 میں ڈبلیو ایچ او نے تمباکو نوشی سے متعلق ایک فریم ورک بنایا تھا جس میں یہ کہا گیا تھا کہ دستخط کرنے والے ممالک تمباکو کے پروڈکٹس پر زیادہ ٹیکس لگا کر، اشتہارات پر پوری طرح پابندی عائد کرکے اور تمباکو نوشی سے صحت پر ہونےوالی منفی اثرات کے بارے عوام کو بتائیں۔

عالمی ادارے صحت کی ایک رپورٹ کے مطابق تقریباً دنیا کے دو تہائی تمباکو نوش 10 ممالک میں رہتے ہیں اس میں 30 فی صد افراد چین میں رہتے ہیں، 10 فی صد انڈیا میں، اور باقی انڈونیشیا، روس، امریکہ، جاپان، بنگلہ دیش، جرمنی اور ترکی میں رہتےہیں۔

اس برس کے آغاز میں ڈبلیو ایچ او نے آگاہ کیا تھا کہ اگر دنیا کی حکومتیں تمباکو نوشی کے خلاف سخت اقدامات نہیں کرتیں تو اس صدی میں تمباکو نوشی کے سبب ایک ارب افراد کی موت ہوسکتی ہے۔

ڈبلیو ایچ او کی رپورٹ میں مزید کہا گیا ہے کہ 2030 تک تمباکو نوشی سے متعلق اموات ایک برس میں 8 ملین افراد متاثر ہوں گے اور اس میں 10 فی صد اموات ترقی پذیر ممالک میں ہوں گی۔

__________________