ہالینڈ کی ایک عدالت نے فیصلہ دیا ہے کہ مسلمانوں اور اسلام کے خلاف ہتک آمیز رویے کی پاداش سیاست
دان اور فلم ساز گیرٹ وِلڈرز کے خلاف قانونی چارہ جوئی کی جائے گی۔

بدھ کے روز ایمسٹرڈم کی اپیل عدالت نے فیصلہ سنایا کہ رائے کی آزادی کے حق کا یہ مطلب نہیں ہے کہ نسلی بنیادوں پر مبنی حقارت کے جذبات پر اُکسائیں۔

عدالت کا کہنا تھا کہ ولڈرز کے تبصروں اور فلموں کے باعث ہالینڈ اور بیرونِ ملک لوگوں کو آواز اُٹھانے پر اکسایا۔ عدالت نے مزید کہا کہ ِاسی بات پر ولڈرز کو قانون کے کٹہرے میں لانا مفادِ عامہ کے عین مطابق ہوگا۔

عدالت کے اِس فیصلے پر بیان دیتے ہوئے ولڈرز نے کہا کہ آج کا دِن آزایِ رائے کے خلاف سیاہ دِن کے طور پر یاد رکھا جائے گا۔

فلم ’فِتنہ’ بنانے پر ولڈرز گذشتہ سال بین الاقوامی توجہ کا مرکز بنے، جِس میں دہشت گرد حملو ں اور قرآن کی آیتوں کوایک ساتھ دکھایا گیا ہے ۔اُنھوں نے ہالینڈ کی حکومت سے مطالبہ کیا کہ قرآن پر بندش عائد کی جائے۔

یاد رہے کہ ہالینڈ میں مسلمان تارکینِ وطن کی بڑی تعداد آباد ہے جِن کے بعض اوقات شہریوں سے جھڑپیں ہوئی ہیں۔

2004ء میں ایک ڈچ مسلمان کا نام اُس وقت خبروں میں آیا تھا جب اُس نے اسلام کے خلاف بے حرمتی کا الزام عائد کرتے ہوئے فلم ساز تھیو وان گو کو گولی مار کر ہلاک کر دیا تھا۔