تیزی سے پھیلتا ہوا پولیو اور حکومتی دعوے
آج ٹی وی رپورٹ
کراچی: پاکستان میں پولیو دوبارہ وبائی مرض کی صورت اختیار کرتا جارہا ہے یہی وجہ ہے کہ پولیو سے متاثرہ ممالک میں پاکستان تیسرے نمبر پر آگیا ہے۔انیس سو پچانوے میں دعویٰ کیا گیا تھا کہ پاکستان سے پولیو کا خاتمہ ہوگیا ہے پھر آہستہ آہستہ دوبارہ پولیو کے کیس منظر عام پر آنے لگے۔ اقوام متحدہ کی رپورٹ کے مطابق پاک افغان سرحدی علاقہ اس مرض سے سب سے زیادہ متاثر ہے۔ یہاں کسی بھی وقت یہ وبائی مرض کی طرح پھوٹ سکتا ہے۔

نائیجیریا اور بھارت کے بعد پاکستان تیسرا ملک ہے جہاں پولیو کے سب سے زیادہ کیس رپورٹ ہوئے ہیں ۔نائیجیریا میں اب تک پانچ سو آٹھ، بھارت میں تین سو اڑتالیس اور پاکستان میں اب تک پینسٹھ کیسز رپورٹ کئے جاچکے ہیں جبکہ افغانستان میں اب تک پولیو کے چودہ مریض منظر عام پر آئے ہیں۔

حکومت کا کہنا ہے کہ صورت حال پر گہری نگاہ ہے۔ ہر سال پولیو سے بچاؤ کی مہم زور شور سے چلائی جاتی ہے مگر حقیقت یہ ہے کہ پولیو کے مریضوں کی تعداد جو گزشتہ برس اکیس تھی اب پینسٹھ تک پہنچ گئی ہے۔ اس بیماری کے خاتمے کے بارے میں سرکاری اعلانات اب تک محض دعوے ہی ثابت ہوئے ہیں۔