تیل کی قیمتوں کااضافہ صارفین پرڈالنے سواکوئی راستہ نہیں ،وزارت خزانہ



اسلام آباد(جنگ نیوز) وزارت خزانہ کا کہنا ہے کہ حکومت کے پاس تیل کی قیمتوں کا اضافہ صارفین پرڈالنے سواکوئی راستہ نہیں،بجلی کے بحران پرقابو پانے کیلئے نئے ڈیموں کی تعمیرضروری ہے،انہوں نے کہا کہ نئے ڈیموں کی تعمیر کیلئے قومی اتفاق رائے پیدا کرنے پر زوردیا ہے۔ نگران وزیرخزانہ ڈاکٹر سلمان شاہ نے کہا کہ بجلی کی طلب میں تیزی سے اضافہ ہوا ہے۔ بجلی کی قلت پر قابو پانے کیلئے کوششیں کی جارہی ہیں تاہم انہوں نے کہا کہ سستی بجلی کی پیداوار کیلئے نئے ڈیموں کی تعمیر کیلئے قومی اتفاق رائے پیدا کرنا ضروری ہے۔ تیل کی قیمتوں کے حوالے سے انہوں نے کہا کہ حکومت پٹرولیم مصنوعات پر 14 ارب روپے کی سبسڈی دے رہی ہے۔ انہوں نے کہا کہ گزشتہ چند سالوں میں عالمی منڈی میں تیل کی قیمتیں20 ڈالر فی بیرل سے بڑھ کر 100ڈالر فی بیرل ہوگئی ہیں۔