وزیر خزانہ سید نوید قمر نے کہا ہے کہ حکومت نے تیل کی قیمتوں کا تعین کرنے والے فارمولے میں بعض اہم تبدیلیاں کی ہیں جس سے تیل کو صاف، اسکی ترسیل اور خرید و فروخت کرنے والی کمپنیوں کے نفع میں کمی واقع ہو جائے گی تاہم ان نئے اقدامات کا تیل کی مصنوعات کی قیمتوں پر کوئی فوری فرق نہیں پڑے گا۔
کابینہ کی اقتصادی رابطہ کمیٹی میں ہونے والے فیصلوں کے اعلان کے لیے بلائی گئی پریس کانفرنس میں انہوں نے کہا کہ نئے فارمولے کے اطلاق اور ڈیلرز اور پٹرول صاف کرنے اور بیچنے والوں کے نفع میں کمی سے فی لیٹر چار سے پانچ روپے کمی واقع ہو سکتی ہے لیکن حکومت چونکہ ڈیزل پر دی گئی سبسڈی کو ختم کر رہی ہے لہذا ان مصنوعات کی قیمتوں میں ہونے والی اس ممکنہ کمی کا فائدہ عام صارف تک منتقل نہیں کیا جا رہا۔

وزیر خزانہ نے کہا کہ پاکستانی اور بین الاقوامی مارکیٹ میں ڈیزل کی قیمت میں پایا جانے والا فرق اتنا زیادہ ہے کہ یہ اقدامات بھی اندرون ملک ان مصنوعات کی قیمتوں میں کمی کا ذریعہ نہیں بن سکتے۔ انہوں نے بتایا کہ حکومت آج بھی ڈیزل پر فی لیٹر پینتیس روپے سبسڈی دے رہی ہے جس کی ماہانہ مقدار تیس ارب روپے ہے۔ انہوں نے کہا کہ حکومت آہستہ آہستہ اس سبسڈی کو ختم کرنے کے لیے یہ اقدامات لے رہی ہے تاکہ جب یہ مکمل طور پر ختم کر دی جائے تو اسکا بوجھ عام صارف کو متاثر نہ کرے۔

پٹرولیم مصنوعات کی قیمتوں کے تعین کے نئے فارمولے اور دیگر اقدامات کی تفصیل بتاتے ہوئے انہوں نے کہا کہ تیل صاف کرنے والے کارخانوں (ریفائنری) پر عائد دو قسم کی ڈیوٹیز کی شرح دس فیصد سے کم کر کے ساڑھے سات فیصد کر دی گئی ہے۔

تیل فراہم کرنے والی کمپنیز (او ایم سیز) کے نفع کو سو ڈالر فی بیرل تیل کی قیمت پر ملنے والے نفع کی سطح پر منجمد کر دیا گیا۔ یعنی اگر تیل کی قیمت دو سو ڈالر فی بیرل بھی ہو جائے تو ان کمپنیز کے نفع میں اضافہ نہیں ہو گا۔ اسی طرح پٹرول پمپس کے نفع کو بھی اسی تناسب سے منجمد کر دیا گیا ہے۔