جاپان کی پارلیمنٹ نے خلائی پروگرام کے حوالہ سے بل کی منظوری دیدی ہے۔ اس بل کی منظوری سے ملکی سیکورٹی فورسز کو پہلی مرتبہ خلائی پروگرام کو دفاعی مقاصد کیلئے استعمال کرنے کی اجازت مل گئی ہے۔ جاپان کے ذرائع ابلاغ کے مطابق پارلیمنٹ کے ایوان بالا میں اس حوالہ سے بدھ کو رائے شماری ہوئی جس میں 221 اراکین نے بل کی منظوری جبکہ 14 نے مخالفت میں ووٹ ڈالے۔ ایوان زیریں اس سے قبل بل کی منظوری دے چکا تھا۔ بل میں اس بات کی وضاحت کی گئی ہے کہ خلائی پروگرام کو 1947ء کے مرتب کردہ آئین کے دائرہ کار کے اندر رہتے ہوئے استعمال کیا جائے گا۔ ذرائع کے مطابق اس بل کی منظوری سے جاپان مستقبل قریب میں فوجی اور جاسوس سیٹلائٹ خلاء میں روانہ کرے گا جبکہ اس کے علاوہ خلائی پروگرام کو امریکہ کے ساتھ ملکر بنائے جانے والے میزائل دفاعی شیلڈ کیلئے بھی استعمال میں لایا جائے گا۔