ججز ضرور بحال ہونگے،عوامی مینڈیٹ کو نقصان پہنچانے نہیں دینگے،نواز شریف
اسلام آباد (جنگ نیوز) پاکستان مسلم لیگ(ن) کے قائد اور سابق وزیراعظم میاں محمد نواز شریف نے کہا ہے کہ انتخابات میں جمہوری قوتوں کو واضح مینڈیٹ ملا ہے ۔اس سے کسیصورت بھی عوامی مینڈیٹ کو نقصان نہیں پہنچنے دیں گے،12مئی اور 9اپریل کے سانحات کے باعث حکومت سازی میں متحدہ کی شمولیت پر تحفظات ہیں۔ ان خیالات کا اظہار انہوں نے منگل کوپنجاب ہاؤس اسلام آباد میں کراچی بار ایسوسی ایشن کے جنرل سیکرٹری نعیم قریشی کی قیادت میں وکلا کے وفد سے ملاقات میں کیا ۔ میاں محمد نواز شریف نے کہا کہ 12 مئی کو کراچی میں رونما ہونے والے سانحے کے حوالے سے ان کی جماعت کا واضح اور اصولی موقف ہے ۔ سانحے میں ملوث عناصر کو انصاف کے کٹہرے میں لانا ضروری ہے ۔ 9 اپریل کے المناک واقعات کی تحقیقات بھی حکومت کی ذمہ داری ہے۔انہوں نے کہا کہ کراچی کے ان واقعات کی وجہ سے ہم نے ایم کیو ایم کے حوالے سے حکومت سازی سمیت مختلف مواقع پر تحفظات کا اظہار کیا ۔

__________________