ججز کی پارلیمنٹ سے بحالی کیخلاف ہائیکورٹ میں پٹیشن اسلام آباد…مولوی اقبال حیدر نے اسلام آباد ہائیکورٹ میں رٹ پٹیشن دائرکی ہے جس میں موقف اختیار کیا گیا ہے کہ ججز سے متعلق کوئی معاملہ پارلیمنٹ میں زیر بحث نہیں لایا جا سکتا اور عدالت عالیہ اسپیکر ، ڈپٹی اسپیکر کو قرارداد پیش کرنے سے روکے۔مولوی اقبال حیدر نے آئین کے آرٹیکل 199کے تحت پٹیشن دائر کی ہے جس میں انہوں نے اسپیکر ، ڈپٹی اسپیکرقومی اسمبلی اور سیکرٹری قانون کو فریق بنایا ہے۔ انہوں نے اپنی پٹیشن میں موقف اختیار کیا کہ ججز سے متعلق کوئی بھی معاملہ آئین کے آرٹیکل 68اور 69کے تحت پارلیمنٹ میں پیش نہیں کیا جاسکتااس کے علاوہ یہ اقدام تین نومبر کے بعد تشکیل پانے والی سپریم کورٹ کے فیصلے کی بھی خلاف ورزی ہوگی جس میں پی سی او اور ججز کی برطرفی کو جائز قرار دیا گیا ہے۔انہوں نے مطالبہ کیا کہ اگر قرارداد اسمبلی میں پیش کی جائے تو اسپیکرکونااہل قرار دیا جائے۔مولوی اقبال حیدر کی درخواست پر سماعت کل ہوگی۔

__________________