ججوں کی 30 روز میں بحالی کے اعلان سے دستبردار نہیں ہو نگے،نواز شر یف کی قاضی حسین کو یقین دہانی
لاہور (جنگ نیوز) پاکستان مسلم لیگ (ن) کے قائد میاں نواز شریف اور جماعت اسلامی پاکستان کے امیر قاضی حسین احمد نے اس بات پر اتفاق کیا ہے کہ ججوں کی بحالی کے مسئلے پر کوئی عذر قبول نہیں کیا جائے گااور نہ ہی ان کی بحالی کے لیے کوئی پارلیمانی کمیٹی بنانے کی ضرورت ہے ،اس امر کا اظہار ہفتہ کے روز جاتی امراء رائے ونڈ میں میاں نواز شریف سے ملاقات کے بعد قاضی حسین احمد نے صحافیوں سے گفتگو کرتے ہوئے کیا ۔ملاقات تقریباً ساڑھے تین گھنٹے تک جاری رہی ملاقات میں قاضی حسین احمد کی معاونت سے لیاقت بلوچ ‘ امیر العظیم ‘ حافظ ادریس ‘ میاں مقصود احمد ‘ فرید احمد پراچہ ‘ عبدالغفار وغیرہ نے کی جبکہ میاں نواز شریف کی معاونت راجہ ظفر الحق ‘ سرانجام خان ‘ ذوالفقارعلی خان کھوسہ نے کی قاضی حسین احمد نے کہا کہ کچھ روز قبل میاں نواز شریف نے ا پنے بھر پور وفد کے ہمراہ ان سے ملاقات کی تھی جس کے جواب میں آج وہ ان کی رہائش گاہ پر آئے ہیں قاضی حسین احمد نے کہا کہ نواز شریف نے انہیں اس بات کی مکمل یقین دہانی کرائی ہے کہ وہ اور ان کی جماعت ججوں کی 30روز میں بحالی کے اعلان سے دستبردار نہیں ہوں گے۔نواز شریف نے یہ بھی کہا کہ ایم کیو ایم قابل معافی نہیں،اعلان مری پر عمل کیا جائیگا۔ انہوں نے کہا کہ میاں نواز شریف اس مسئلے پر سنجیدہ ہیں۔ اور ملاقات میں اتفاق کیا گیا کہ اس معاہدہ کی کسی صورت خلاف ورزی نہیں ہونی چاہئے۔ ایک سوال کے جواب میں انہوں نے کہا کہ ججوں کی بحالی کے لیے کسی پارلیمانی کمیٹی کی ضرورت نہیں ہے ۔ بلکہ انہیں صرف ایک ایگزیکٹو آرڈر کے ذریعے بحال کیا جاسکتا ہے ۔

__________________