جرأت مندانہ فیصلے ملک کو ترقی کی جانب لے جائیں گے، ثروت اعجاز قادری



کراچی (اسٹاف رپورٹر) سنی تحریک کے سربراہ محمد ثروت اعجاز قادری نے کہا ہے کہ اعلیٰ عدلیہ کے فیصلے نے جمہوری اداروں کو مضبوط کرنے کے ساتھ ساتھ چور دروازے سے داخل ہونے والے آمروں کا راستہ ہمیشہ کیلئے روک دیا ہے۔ انقلابی آئینی وقانونی جرأت مندانہ فیصلے ملک کو ترقی کی جانب لے جانے کا سبب ہوں گے۔ افسوس ڈیڑھ سال سے زائد گزر جانے کے باوجود پارلیمینٹ میں بیٹھے عوامی نمائندے عوام کے مسائل کے حل کیلئے کچھ نہیں کر سکے۔ اورنگی ٹاؤن سیکٹر 10 میں آفس کے افتتاح کے بعد جلسے سے خطاب کرتے ہوئے انہوں نے کہا کہ چادر اور چار دیواری کا تحفظ فراہم کرنا حکمرانوں کی ذمہ داری ہے لیکن حکومت خواتین کو تحفظ فراہم کرنے میں بھی ناکام نظر آرہی ہے۔ عوام کے ووٹ سے اسمبلیوں میں جانے والے مسائل کے حل کے بجائے اپنی کرسیاں بچانے اور اپنے مفادات کی جنگ لڑ رہے ہیں۔ انہوں نے کہا کہ آج عہد کریں کہ ہم اپنا ووٹ ایسے شخص کو دیں گے جس کے دل میں خوف خدا اور حضورﷺ کی سچی محبت ہو، جو عوام کے درد کو اپنا درد سمجھتا ہو جو حکومت میں جانے کے بعد آنکھوں پر کالا چشمہ پہننے کے بجائے عوام کے مسائل کے حل کیلئے میدان میں اترے۔ انہوں نے کہا کہ سنی تحریک کے علاقائی سطح پر آفسز کھلنے کا سلسلہ جاری رہے گا اور اس کا مقصد عوام کی خدمت اور ان کے درپیش مسائل کا حل ہے جو سنی تحریک ہر حال میں جاری رکھے گی۔ ہمیں ملک میں انقلاب لانے کیلئے جدوجہد کرنا ہو گی جیسے اعلیٰ عدلیہ نے 6 ماہ میں تاریخی فیصلہ دیکر کیا ہے۔ انہوں نے کہا کہ ہمیں محبت اور احترام انسانیت پر گامزن رہتے ہوئے انتہا پسندی اور دہشت گردی کا خاتمہ کرنا ہے۔

__________________