اسلام آباد (ایجنسیاں)سپریم کورٹ بار ایسوسی ایشن کے سابق صدر جسٹس ریٹائرڈ طارق محمود کی اہلیہ نے کہا ہے کہ نگران وزیراعظم محمد میاں سومرو کی طرف سے طارق محمود کی رہائی کے احکامات کے باوجود پنجاب حکومت انہیں رہا کرنے پر تیا رنہیں، ان کی طبعیت انتہائی ناسازگار ہے، انہیں فوری طور پر رہا کیا جائے- پیر کو اخبار نویسوں کے نام اپنے ایک پیغام میں مسز طارق محمود نے کہا کہ وفاقی حکومت نے جسٹس طارق محمود کی ایک ماہ نظربندی کے احکامات دیئے تھے جنہیں نگران وزیراعظم نے 23 نومبر کو ختم کر دیا لیکن اب تک انہیں رہا نہیں کیا گیا- انہوں نے کہا کہ پنجاب حکومت کی طرف سے جسٹس طارق محمود کی تین ماہ کی نظربندی کے احکامات جاری ہوئے ہیں ان کی طبعیت انتہائی ناساز ہے اور وہ سروسز ہسپتال میں زیر علاج ہیں جہاں انہیں سخت پہرے میں رکھا گیا ہے اور اہل خانہ کو ملاقات کی اجازت نہیں،- مسز طارق محمود نے کہا کہ ان کے دو کمسن بچے جن میں سے ایک کی عمر پندرہ اور دوسرے کی گیارہ سال ہے، شدید ذہنی دباؤ کا شکار ہیں جبکہ ان کے امتحانات قریب ہیں انہوں نے مطالبہ کیا کہ جسٹس طارق محمود کی نظربندی کے احکامات واپس لیکر انہیں فوری طور پر رہا کیا جائے۔-

__________________