حکومت نے سابق وزیراعظم نواز شریف اور انکے خاندان کی وطن واپسی سے متعلق آئینی درخواست پر قانونی اعتراضات پر مشتمل جواب دعوٰی عدالت میں جمع کروا دیا ہے جس میں نواز شریف کے بیرون ملک روانگی کے وقت ہونے والے مبینہ معاہدے کی نقل بھی شامل کی گئی ہے۔
تاہم حکومت کی جانب سے جمع کروائی گئی ایک اور درخواست میں اس معاہدے کی اصل دستاویز جمع کروانے کے لئے تین ہفتے کی مہلت طلب کی گئی ہے۔
بدھ کے روز سپریم کورٹ کی جانب سے حکومت کو معاہدے کی دستاویز عدالت میں جمع کروانے کے لیے دی گئی مہلت کا آخری دن تھا۔

حکومت کی جانب سے دائر کیےگئے جواب دعوی میں مؤقف اختیار کیا گیا ہے کہ نواز شریف اور ان کے خاندان کی بیرون ملک روانگی ان کی آزاد مرضی سے عمل میں آئی لہذٰا یہ معاملہ صرف ایک خاندان تک محدود ہے اور کسی طور انسانی حقوق کا معاملہ نہیں بنتا۔
شریف خاندان کی بیرون ملک روانگی کا جواز جس معاہدے کو قرار دیا گیا ہے وہ تین پیروں پر مشتمل ایک تحریر ہے جس میں شریف خاندان کے ہر فرد کے علیحدہ علیحدہ دستخط موجود ہیں لیکن سرکار کی طرف سے کسی کے دستخط نہیں موجود نہیں ہیں۔

جواب دعوٰی کی جو کاپی صحافیوں میں تقسیم کی گئی اس کے ساتھ نوازشریف کے دستخط والا معاہدہ منسلک کیا گیا ہے۔ دو دسمبر سنہ دو ہزار کو ہونے والے اس معاہدے پر نواز شریف نے اپنی جانب سے ایک ایسی شخصیت کو حکومت کے ساتھ معاہدہ کرنے کی اجازت دی ہے جس کا نام ظاہر نہیں کیا گیا۔

معاہدے میں نواز شریف سمیت تمام اہل خانہ نے یقین دہانی کروائی ہے کہ وہ دس سال تک پاکستان واپس نہیں آئیں گے اور نہ ہی سیاست میں حصہ لیں گے۔

معاہدے کی کاپی کے سامنے آنے کے بعد بی بی سی اردو کے جاوید سومرو سے بات کرتے ہوئے شہباز شریف کا کہنا تھا کہ’میں نے آج تک کبھی اس معاہدے سے انکار نہیں کیا۔ میں نے ہمیشہ یہی کہا ہے کہ اگر ایک قیدی سے زبردستی بندوق کی نوک پر کوئی معاہدہ کروایا جائے تو اس کی کیا حیثیت ہو گی؟‘۔

انہوں نے کہا کہ ’میرے پاس اپنی زندگی بچانے کے علاوہ اور کوئی حل نہیں تھا۔ مجھے کچھ یاد نہیں کہ لانڈھی جیل میں جب اس مبینہ معاہدے پر دستخط کروائے گئے تو اس میں کیا تھا اور اس میں بعد میں کیا شامل کر دیا گیا ہو۔ اس معاہدے کی کوئی اخلاقی اور قانونی بنیاد نہیں ہے۔ اگر جھوٹے مقدمات میں ہمیں سزا دینے کی کوشش کی گئی تو ہم اس سے ہرگز نہیں ڈرتے‘۔

یاد رہے کہ سابق وزیراعظم اور پاکستان مسلم لیگ(ن) کے جلاوطن رہنما نواز شریف نے کچھ عرصہ قبل بی بی سی اردو اور حال ہی میں ایک بھارتی ٹی وی چینل کو اپنے انٹرویو میں کہا تھا کہ ان کا جلاوطنی کے بارے میں حکومت پاکستان کے ساتھ کو ئی تحریری معاہدہ نہیں ہے البتہ سعودی عرب کی حکومت سے ایک مفاہمت ضرور ہے۔

سعودی عرب کی حکومت سے معاہدے کے سوال پر میاں نواز شریف نے یہ بھی کہا تھا کہ ان کی سعودی عرب کی حکومت سے اس بات پر مفاہمت ہوئی تھی کہ سعودی عرب میں جانے کے بعد ان پر دنیا میں کہیں بھی جانے پر کوئی پابندی نہیں ہوگی۔

معاہدے کی فوٹو کاپیاں دیکھیں