لاہور (جنگ نیوز) جماعت اسلامی نے اے پی ڈی ایم اور ایم ایم اے کی جماعتوں کے ساتھ مل کر 15نومبر سے حکومت کیخلاف پنجاب کے صوبائی دارالحکومت لاہور سے سول نافرمانی کی تحریک چلانے کا اعلان کرتے ہوئے کہا ہے کہ ہم نگران حکومت انتخابات یا کوئی اور نہیں صرف حکمرانوں کے مستعفی ہونے کا مطالبہ کرتے ہیں ایمرجنسی کا مقابلہ ایمرجنسی سے کریں گے۔ کارکنوں کو ہدایت دیدی ہے کہ وہ گرفتاری کی بجائے احتجاج کو ترجیح دیں چند روز تک لاہور میں اپوزیشن جماعتوں کے رہنماؤں کا اہم اجلاس ہوگا جس میں آئندہ کی حکمت عملی کا اعلان کیا جائے گا۔ ان خیالات کا اظہار گزشتہ روز منصورہ میں جماعت اسلامی لاہور کے امیر حافظ سلمان بٹ نے سابق رکن صوبائی چودھری شوکت علی اور امیرالعظیم کے ہمراہ مشترکہ پریس کانفرنس سے خطاب کرتے ہوئے کیا حافظ سلمان بٹ نے کہا کہ ملک اس وقت انتہائی نازک دور سے گزر رہا ہے۔ اپوزیشن جماعتوں کے رہنماؤں کو چاہئے وہ دو رخی سیاست کرنے کی بجائے یکجا ہوکر حکومت کے خاتمے کیلئے تحریک چلائیں انہوں نے کہا کہ 15نومبر کو زندہ دلان لاہور حکومت کے خلاف میدان میں نکلیں گے اور جگہ جگہ ہاتھوں کی زنجیر اور احتجاج کرکے سول نافرمانی کی تحریک کا آغاز کیا جائے گا اور پھر یہ تحریک پورے ملک میں پھیل جائے گی انہوں نے کہا کہ فوجی حکومت سے کسی بھی صورت ہاتھ نہیں ملایا جاسکتا بلکہ ہم ملک میں جمہوریت کی بحالی اور عدلیہ کی آزادی کیلئے جدوجہد کو ترجیح دیں گے۔ پی سی او کے تحت حلف نہ اٹھانے والے جج صاحبان کو خراج تحسین پیش کرتے اور ہم سمجھتے ہیں کہ وہ اب بھی جج ہیں اور ان کا تحفظ کرنا بھی ہم پر فرض ہے انہوں نے کہا کہ جنرل پرویز مشرف نے عدالت میں یقین دہانی کرائی ہے کہ وہ 15نومبر تک وردی اتاردیں گے اور اب انہیں اپنے وعدے کے مطابق وردی اتار دینی چاہئے ہم اس دن کو بھی یوم سیاہ کے طور پر منائیں گے۔ انہوں نے کہا کہ قبائلی علاقوں اور سوات کے مسائل کو مذاکرات کے ذریعے ہی حل کیا جانا چاہئے۔

__________________