راولپنڈی (جنگ نیوز) مسلم لیگ( ن) کے مرکزی سینئر نائب صدر مخدوم جاوید ہاشمی نے کہاہے کہ اسلام، پاکستان اور جمہوریت کے راستے میں سب سے بڑی رکاوٹ آمر حکمران ہیں، امریکا نے پاکستان میں فوجیں اتاریں تو اسے عالم اسلام پر حملہ تصور کیاجائیگا اورا سے واپسی کا راستہ بھی نہیں ملے گا جبکہ پرویزمشرف اپنی پالیسیوں کی ناکامی کے اعتراف کے بعد خطے میں امن کیلئے مستعفی ہو جائیں۔ ان خیالات کا اظہار انہوں نے اتوار کومقامی ہوٹل میں حلقہ این اے55 مسلم لیگ ن کے زیر اہتمام منعقدہ ایک بڑے ورکرز کنونشن سے خطاب کرتے ہوئے کیا۔ مخدوم جاویدہاشمی نے کہا کہ راولپنڈی مسلم لیگ (ن) کا قلعہ اورمیاں نواز شریف کے چاہنے والوں کا شہر ہے، یہاں کی عوام سے مجھے جوپیار ملا ہے وہ میں کبھی فراموش نہیں کر سکتا اورمیں نے کبھی یہ نہیں سمجھاکہ صرف ملتان ہی میرا گھر ہے ۔ انہوں نے کہاکہ آمریت کے خلاف جدوجہد میں راولپنڈی کی سڑکوں پر میں نے اپناخون بہایا ہے اور پورا پاکستان میرا گھر ہے اوراس گھر کو بچانے کیلئے اڈیالہ جیل راولپنڈی کی تنگ و تاریک کوٹھڑیوں میں قیدرہا۔انہوں نے کہا کہ راولپنڈی پاکستان کا دل ہے اور جاوید ہاشمی ہر دل میں بس رہا ہے جبکہ عوام کیساتھ جینا اور عوام کے ساتھ مرنا اپنا حق سمجھتا ہے۔ جاوید ہاشمی نے کہا کہ خدا کا فضل ہے کہ آج ہم روشنیوں کے قافلے کے سالار ہیں اور عوام ہمارے ساتھ ہیں ، ہم عزت اور غیرت کے ساتھ جئیں گے اور اپنے ملک کو مزید طاقتور اورترقی یافتہ بنائیں گے۔ انہوں نے کہاکہ ترقی کا ڈھنڈورا پیٹنے والے بتائیں کہ وہ کس منہ سے عوام سے ووٹ مانگ رہے ہیں ۔ قبل ازیں کنونشن سے خطاب کرتے ہوئے مسلم لیگ( ن) پنجاب کے نائب صدر چوہدری تنویر خان ، مسلم لیگ راولپنڈی کے صدر و سابق ایم پی اے اختر محمود ایڈووکیٹ، مسلم لیگ شعبہ خواتین پنجاب کی صدر بیگم نجمہ حمید نے بھی خطاب کیا۔ جلسہ میں ملک ناظم الدین ناظم ، ملک نقشب بدر، کونسلروں چودھری مدبر اقبال، ثمینہ گل ، چودھری محمد الیاس ، عبدالرزاق طور ور عبدالرحمان طور سمیت دیگر نے بھی شرکت کی اور حلقہ این اے 55 میں مخدوم جاوید ہاشمی اور حلقہ پی پی 12سے صوبائی اسمبلی کے امیدوار شہر یار ریاض کی حمایت کا اعلان کیا۔