جنسی تعلیم پر بھارتی سماجی حلقوں میں زبردست بحث

بھارتی اسکولوں میں نو عمر طلبہ و طالبات کو جنسی تعلیم پر سماجی حلقوں میں زبردست بحث شروع ہو گئی ہے۔ تعلیمی نصاب میں شامل نہ ہونے کے باوجود پرائیویٹ اسکولوں کی ایک بڑی تعداد میں 15 سال کی عمر کے طلباء و طالبات کو جنسی تعلیم دینے کا سلسلہ شروع کر دیا گیا ہے جس کی قدامت پسند اور مذہبی حلقے شدید مخالفت کر رہے ہیں جبکہ جدت پسندوں کا کہنا ہے کہ نوجوانوں کو جنسی امراض سے آگاہی اور ان سے بچنے کیلئے جنسی تعلیم بے حد ضروری ہے۔

بعض پرائیویٹ اسکولوں نے دعویٰ کیا ہے کہ وہ اپنے طلباء و طالبات کو جنسی تعلیم ان کے والدین کی رضا مندی حاصل کرنے کے بعد دے رہے ہیں جس کی تصدیق ان طلباء کے والدین نے بھی کی ہے۔ انہوں نے مزید کہا کہ چونکہ و الدین اپنے بچوں کو جنسی معلومات دینے سے شرم محسوس کرتے ہیں اس لئے سکولوں میں اس تعلیم کا انتظام ان کیلئے مفید ثابت ہو گا۔

بھارت کی ہندو انتہا پسند جماعت وشو ہندو پریشد کے رہنما سوامی نیتانند نے اس معاملے پر تبصرہ کرتے ہوئے کہا کہ اسکولوں میں جنسی تعلیم معاشرے میں بے راہ روی کے فروغ کا باعث بن سکتی ہے۔ انہوں نے کہا کہ یہ عمل فطری ہے اور بھارتی شہری ان چیزوں کو قدرتی طورپر ہی بہتر انداز میں سیکھ سکتے ہیں۔

ایک پرائیویٹ اسکول میں جنسی تعلیم کی استاد کا کہنا ہے کہ جنس ایک پیچیدہ موضوع ہونے کے باوجود انہیں نوجوان طلباء و طالبات کو اس کی تعلیم دینے میں کوئی دشواری نہیں۔ انہوں نے کہا کہ جب ہم مغربی معاشرے سے فاسٹ فوڈ، تنگ لباس اور زبانیں سیکھنے میں کوئی عار محسوس نہیں کرتے تو اپنے بچوں کو اسکولوں میں جنسی تعلیم دینے میں بھی کوئی عار محسوس نہیں کرنی چاہئے۔

ایک پرائیویٹ اسکول میں زیر تعلیم 15 سالہ طالبہ ردہیما تیواری نے بتایا کہ جنسی تعلیم کی کلاس کے دوران اسے ایسی چیزیں معلوم ہوئیں جو پہلے اسے معلوم نہیں تھیں ۔ اسے یقین ہے کہ ان معلومات کی مدد سے وہ اپنی صحت کا زیادہ بہتر انداز میں خیال رکھ سکے گی۔

__________________