جنوبی وزیرستان: 3 سیکیورٹی اہلکاروں کی مسخ لاشیں برآمد،طالبان کمانڈرکا گھر تباہ
راولپنڈی(مانیٹرنگ ڈیسک) جنوبی وزیرستان کی تحصیل لدھا میں تین سیکیورٹی اہلکاروں کی مسخ شدہ لاشیں برآمد ہوئی ہیں۔ادھر جنڈولہ کے علاقے صفرئی میں سیکیورٹی فورسز نے جاری آپریشن کے دوران طالبان کمانڈر خان گل کا گھر دھماکے سے اڑا دیا۔ فورسز نے کارروائی کے دوران ایک اور مکان سے ہتھیار اور گولہ بارود بھی برآمد کیا ہے۔ تفصیلات کے مطابق سیکیورٹی فورسز کی تحصیل لدھا سے ملنے والی یہ لاشیں تین سے چار دن پرانی ہیں تاہم حتمی طور پر کچھ نہیں کہاجاسکتا۔ اس بارے میں تفتیش جاری ہے کہ انکی ہلاکت کیسے ہوئی۔ سیکیورٹی ایجنسیاں اپنے طور پر تفتیش کررہی ہیں۔ مذکورہ اہلکار پچھلے چند دنوں سے ڈیوٹی سے غیر حاضر تھے۔ اس واقعہ کے بعد اہلکاروں میں عدم تحفظ کا احساس پیدا ہورہا ہے۔ علاقے کے گشت میں اضافہ کردیا گیا ہے۔ ادھر جنڈولہ کے علاقے صفرئی میں سیکورٹی فورسز نے جاری آپریشن کے دوران طالبان کمانڈر خان گل کا گھر دھماکے سے اڑا دیا۔جبکہ اس دوران سیکورٹی فورسز نے ایک اور مکان سے ہتھیار اور گولہ بارود بھی برآمد کیا ہے۔اطلاعات کے مطابق طالبان کمانڈر ایک عرصہ سے علاقے میں سیکیورٹی فورسز کے خلاف بڑی کارروائیوں میں ملوث تھا۔

__________________