وانا،ہنگو( بیورورپورٹ،آن لائن) جنوبی وزیرستان میں دو مختلف مقامات پر سیکیورٹی فورسز اور عسکریت پسندوں کے درمیان جھڑپوں میں ایک سیکیورٹی اہلکار جاں بحق اورتین زخمی ہوگئے تاہم آئی ایس پی آر نے ہلاکت کی تصدیق نہیں کی ہے جبکہ ہنگو اوربونیرمیں بم دھماکوں میں9 دکانیں تباہ ہوگئیں۔ آئی ایس پی آر کے ترجمان نے بتایا کہ نامعلوم مسلح افراد نے تیارزہ فورس اور چغملائی فورس کی چیک پوسٹوں پر فائرنگ کی ہے، جس پرسیکیورٹی فورسز نے بھی جوابی فائرنگ کی تاہم دونوں اطراف سے کسی قسم کا جانی ومالی نقصان نہیں ہوا تاہم دیگر ذرائع کے مطابق فائرنگ کے اس تبادلے میں ایک سیکیورٹی اہلکارجاں بحق اورتین زخمی ہوگئے۔دوسری جانب ہنگو میں پیرکی شب نامعلوم ملزما ن نے ٹل روڈ پر واقع ایک ویڈیو سینٹرکو دھماکے سے اڑادیاجس سے لاکھوں روپے مالیت کا سامان جل گیا۔ضلع بونیر کے تھانہ ڈگرکی حدود میں واقع شل بانڈی شریف بازار میں بھی پیر کی رات ایک زورداردھماکا ہوا۔ پولیس کے مطابق بم نامعلوم افراد نے ایک زنانہ شاپنگ سینٹرکواڑا نے کیلئے نصب کیا تھا جس کے نتیجے میں شاپنگ سینٹر سمیت 8دکانیں تباہ ہوگئیں۔بتایا جاتا ہے کہ تباہ شدہ شاپنگ سینٹرکونامعلوم افراد کی جانب سے کئی دھمکی آمیز خطوط بھی موصول ہوئے تھے جن میں انہیں اپنا کاروباربندکرنے کی ہدایت کی گئی تھی۔ پولیس نے مقدمہ درج کر کے تفتیش شروع کردی ہے۔علاوہ ازیں ٹانک میں عمر اڈہ چیک پوسٹ پر نامعلوم شرپسندوں نے فائرنگ کی جس سے کوئی جانی نقصان نہیں ہوا۔