رفعت اللہ اورکزئی (پشاور)، ہارون رشید (اسلام آباد)




پاکستانی فوج نے دعوٰی کیا ہے کہ جنوبی وزیرستان میں فوجی آپریشن میں گزشتہ 24 گھنٹے کے دوران 60 شدت پسند مارے گئے ہیں جبکہ پاک فوج کے 5 جوان جاں بحق ہوئے ہیں۔
فوج کے شعبہ تعلقات عامہ آئی ایس پی آر کی طرف سے اتوار کو جاری ہونے والے ایک بیان میں کہا گیا ہے کہ آپریشن کے دوران شکئی، کنی گورم اور سراروغہ کو آنے جانے والے تمام راستوں پر کنٹرول حاصل کرلیا گیا ہے جبکہ منڈانا، کنڈ اور ترکئی تک علاقے کو بھی محفوظ بنادیا گیا ہے۔
دوسری جانب تحریک طالبان پاکستان نے سکیورٹی فورسز کے ان دعوؤں کو مسترد کیا ہے جس میں اس نے انہیں شدید جانی نقصان پہنچانے اور سپنکئی رغزئی کے علاقے پر قبضے کا دعوی کیا تھا۔ بی بی سی سے ٹیلیفون پر بات کرتے ہوئے تنظیم کے ترجمان اعظم طارق نے خیسورہ کے مقام پر محض ایک جنگجو کی ہلاکت کی تصدیق کی ہے۔
فوج کا کہنا ہے کہ جھڑپوں میں تیس شدت پسند ہلاک اور متعدد زخمی ہوئے جبکہ دو سکیورٹی اہلکار بھی ہلاک اور چار زخمی ہوئے۔
بیان میں مزید کہا گیا ہے کہ شکئی، کنی گورم اور لدھا کے علاقوں میں سکیورٹی فورسز نے سات کلومیٹر اندر جاکر کارروائی کی ہے اور وہاں بویا نرئی اور وضہ کے علاقوں پر قبضہ کرلیا ہے۔ شیرونگی کے علاقے میں بھی کارروائی جاری ہے جہاں بیس شدت پسندوں کے مارے جانے کا دعوی کیا گیا ہے۔ اس آپریشن میں ایک سپاہی ہلاک جبکہ تین زخمی ہوئے۔
آئی ایس پی آر کے مطابق رزمک کے جنوب میں بھی سکیورٹی فورسز نے اہم مقامات پر قبضہ کرلیا ہے اور اس دوران جھڑپوں میں دس عسکریت پسند مارے گئے۔ اس لڑائی میں دو سکیورٹی اہلکار بھی ہلاک اور چار زخمی ہوئے۔
بیان میں مزید دعوٰی کیا گیا کہ کاروائیوں میں شدت پسندوں کی متعدد گاڑیاں اور پناہ گاہیں تباہ کردی گئی ہیں۔

دوسری جانب تحریک طالبان کے ترجمان اعظم طارق کا کہنا تھا کہ انہوں نے آغاز میں ہی حکام کو متنبہ کر دیا تھا کہ ’وزیرستان آنا خالہ جی کا گھر نہیں ہوگا۔ جو کارروائی پاکستانی سکیورٹی فورسز نے شروع کی ہے وہاں پر اسے ناکامی نصیب ہوئی ہے۔ زرمک میں انہوں نے ٹینکوں اور گاڑیوں کے ذریعے پیش قدمی کی کوشش کی لیکن ہمارے ساتھیوں نے انہیں واپسی پر مجبور کر دیا‘۔
ان کا کہنا تھا کہ فوج نے سپنکئی رغزئی کے اطراف میں ایک چھوٹی سی پہاڑی پر قبضہ کرنے کی کوشش کی جسے انہوں نے ناکام بنا دیا۔ ان کا کہنا تھا کہ اگر میڈیا کو آنے کی اجازت دی جاتی تو انہیں وہاں کی اصل صورتحال کا علم ہوتا۔ ان کا دعوٰی تھا کہ سپنکئی رغزئی سے آگے جنڈولہ تک کے علاقے ان کے قبضے میں ہیں۔ ’وہاں بھاری تعداد میں اسلحہ ہمارے ہاتھ لگا ہے جسے ہم نے محفوظ مقام پر منتقل کر دیا ہے‘۔
انہوں نے تسلیم کیا کہ سکیورٹی فورسز نے خیسورہ کے مقام پر پیش قدمی کی کوشش کی لیکن انہیں ایک مقام پر اپنے حصار میں لے لیا ہے جو ان کے بقول ابھی بھی جاری ہے۔ ان کا کہنا تھا کہ فوجی ہیلی کاپٹروں کے ذریعے وہاں سے لاشیں نکالی ہیں۔ ’ہمارے جنگجو اپنے اپنے مقامات پر ڈٹے ہوئے ہیں اور اس بابت حکومتی دعوے بےبنیاد ہیں`۔
جنوبی وزیرستان میں فوجی کارروائی کو بلاجواز قرار دیتے ہوئے ترجمان کا کہنا تھا کہ گزشتہ چار ماہ سے حکومت امریکی صدر بارک اوباما کو خوش کرنے میں مصروف ہے۔ ’چار ماہ سے ہم پر بمباری کس کی خوشنودی کے لیے کئی جا رہی ہے‘۔
طالبان کے ترجمان نے دھمکی دی ہے کہ وزیرستان میں شروع کی جانے والی جنگ وہاں تک محدود نہیں رہے گی بلکہ پورا ملک اس کی لپیٹ میں آئے گا۔ انہوں نے کہا ’ہمارے یونٹ جو چاہے پنجاب میں ہوں یا کہیں اور، وہ اس تحریک کے دفاع کے لیے کارروائی کرسکتے ہیں‘۔
ان کا کہنا تھا کہ سوات بھی حکومت کے ہاتھ نہیں آیا ہے اور وزیرستان بھی نہیں آئے گا۔ ان کا کہنا تھا کہ ان کے خلاف جنگ انہیں سنے بغیر شروع کی گئی ہے۔ ’ہونا تو یہ چاہیے تھا کہ سیاستدان، صحافی، مصنف، شاعر اور مفکر ان کے پاس آتے اور ان سے ان کا موقف جاننے کی کوشش کرتے‘۔
جنوبی وزیرستان سے اطلاعات کے مطابق آپریشن کے دوسرے روز جیٹ طیاروں نے مشتبہ طالبان کے ٹھکانوں پر بھرپور بمباری کی۔ اتوار کو بھی سکیورٹی فورسز نے نے کارروائیوں کا سلسلہ جاری رکھا اور لڑاکا طیاروں نے درہ مکین، لدھا اور کنی گورم کے علاقوں میں عسکریت پسندوں کے متعدد ٹھکانوں کو نشانہ بنایا ہے۔ تاہم تازہ کارروائیوں میں ہلاکتوں کے حوالے سے مصدقہ اطلاعات نہیں ملی ہیں۔
مقامی لوگوں کے مطابق سنیچر کے مقابلے میں اتوار کو جیٹ طیاروں نے بھرپور حملے کئے ہیں۔
ادھر سنیچر کی رات سکیورٹی فورسز پر ہونے والے ایک حملے میں ایک سکیورٹی اہلکار ہلاک جبکہ ایک کیپٹن سمیت چھ اہلکاروں کے زخمی ہونے کی اطلاعات ہیں۔
اطلاعات ہیں کہ سکیورٹی فورسز کے اہلکار شکئی کی جانب پیش قدمی کررہے تھے کہ اس دوران ژور نرے کے مقام پر ان پر حملہ کیا گیا جس سے ایک اہلکار ہلاک جبکہ ایک کیپٹن سمیت چھ زخمی ہوئے۔

سکیورٹی ذرائع کا کہنا ہے کہ سکیورٹی فورسز نے تحریک طالبان پاکستان کے سربراہ حکیم اللہ محسود کے آبائی علاقے کوٹکی کی پہاڑوں پر پوزیشنیں سنبھال لی ہیں اور وہاں سے پیش قدمی شروع کردی ہے۔ تاہم سرکاری طورپر اس اطلاع کی تصدیق نہیں ہوسکی۔
ان کے مطابق سکیورٹی فورسز نے تین اطراف سے پیش قدمی شروع کی ہے تاہم فوج کو بعض مقامات پر شدید مزاحمت کا بھی سامنا ہے۔
یہ بھی بتایا جارہا ہے کہ نواز کوٹ کے علاقوں میں شدت پسندوں کے کئی ٹھکانوں کو تباہ کیا گیا ہے۔
دریں اثناء جنوبی وزیرستان سے نقل مکانی کا سلسلہ بدستور جاری ہے اور زیادہ تر متاثرین ڈیرہ اسماعیل خان اور ٹانک منتقل ہورہے ہیں۔ مقامی لوگوں کا کہنا ہے کہ ڈیرہ شہر میں متاثرین کےلیے مراکز بنائے گئے ہیں جہاں ان کا اندراج کیا جارہا ہے۔
ادھر شمالی وزیرستان کے راستے آنے والے ہزاروں متاثرین میرعلی پہنچے ہیں تاہم کرفیو کے باعث وہ بدستور وہاں رکے ہوئے ہیں۔
وزیرستان کے قریب واقع بندوبستی علاقوں ڈیرہ اسماعیل خان اور ٹانک میں تمام موبائل فون نیٹ ورکس معطل کردیئے گئے ہیں جس کی وجہ سے علاقے سے آزاد ذرائع سے اطلاعات ملنے میں شدید مشکلات پیش آرہی ہیں۔
میڈیا کو علاقے میں داخلے کی اجازت نہیں اور طالبان کے دعوؤں کی آزاد ذرائع سے تصدیق نہیں ہوسکی ہے اور قبائلی علاقوں میں ماضی کی کارروائی کی طرح اس مرتبہ بھی میڈیا کو صورتحال جاننے کے لیےفریقین کے بیانات پر انحصار کرنا پڑرہا ہے۔

BBC Urdu

__________________