لاہور . . . پنجاب اسمبلی کے اندر اورباہر پیپلزپارٹی کے ارکان نے جیو نیوز نیٹ ورک پر الزامات کی بوچھا ڑ برقرار رکھی، سینئر صوبائی وزیر راجا ریاض نے ایک بار پھر کہا کہ کامران خاں بھارتی ایجنٹ ہیں ، ثبوت مناسب وقت پر قوم کے سامنے لائیں گے ، راجا ریاض جوش خطابت میں بے انظیر انکم سپورٹ پروگرام کو اسپورٹس پروگرام کہہ گئے ۔ پنجاب اسمبلی کے اندراور باہر میڈیا سے گفتگو کرتے ہوئے سینئروزیر راجا ریاض نے کہا کہ وہ اپنے اس بیان پر قائم ہیں کہ کامران خاں بھارتی ایجنٹ ہیں، انہوں نے ڈھائی سال سے صرف صدرزرداری کو نشانہ بنا رکھا ہے۔ ان کا کہناتھا کہ ایک دو روز میں وزیر اعلیٰ سے ملاقات کرکے پیپلزپارٹی کے تحفظات سے آگاہ کروں گا۔ اس دوران راجا ریاض جوش خطابت میں بے نظیر انکم سپورٹ پروگرام کو سپورٹس پروگرام کہہ گئے۔پیپلزپارٹی کی عظمیٰ بخاری نے الزام عائد کیا کہ جیونیٹ ورک میں انڈین کمپنی بجاج کے شیئرز ہیں ،کامران خاں ،انصار عباسی اور حامد میر گوشوارے داخل کرائیں تاکہ پتہ چل سکے کہ دس سال قبل ان کی کیا پوزیشن تھی ۔پی پی پی کے رکن کرنل نوید نے کہا کہ معلوم کیا جائے کہیں کامران خان اور انصار عباسی کے تعلقات اسرائیل کے ساتھ تو نہیں۔ وزیر قانون پنجاب رانا ثنااللہ نے اپنے خطاب میں کہا کہ جن ارکان پر میڈیا میں الزامات لگتے ہیں پارلیمنٹ کو ان کا احتساب کرنا چاہیے،ہمیں بھی جمہوری اداروں پر الزامات پر تشویش ہے کرپٹ لوگوں کا احتساب کیوں نہیں کیا جاتا یہ بھی دیکھنا چاہیئے کہ جمہوری اداروں کو کون بدنام کررہے ہیں۔

__________________
جاویداسد