جوہری تعاون سمجھوتہ سے ایٹمی تجربات کرنے پرپابندی نہیں،بھارت



نئی دہلی (جنگ نیوز) بھارت کے وزیر خارجہ پرناب مکھرجی نے کہا ہے کہ امریکہ اور بھارت کے درمیان جوہری تعاون کے سمجھوتے کے تحت بھارت پر مستقبل میں جوہری تجربہ کرنے پرکوئی پابندی عائد نہیں کی گئی ہے۔بدھ کو بھارتی پارلیمنٹ راجیہ سبھا میں جوہری تعاون سمجھوتے پر بحث میں حصہ لیتے ہوئے پرناب مکھرجی نے کہا کہ جوہری تعاون سمجھوتہ بھارت کے مفاد میں ہے اور اس سے خارجہ پالیسی پر کسی قسم کے اثرات مرتب نہیں ہوں گے۔بھارت خطے کی جیو پولیٹیکل صورتحال کو مد نظر رکھ کر مستقبل میں جوہری دھماکے کا فیصلہ کرے گا۔وزیر خارجہ نے کہاکہ جوہری دھماکے کی صورت میں بھارت کو 1974ء اور 1998ء دھماکوں کے بعد جیسی صورتحال کا سامنا کرنا پڑ سکتا ہے۔بھارت صرف جوہری تعاون کے سمجھوتہ 123 کی پابندی کرے گا جبکہ امریکی ہائیڈ ایکٹ کو نظرانداز کیا جائے گا۔دریں اثناء بھارت میں نچلی ذاتوں سے تعلق رکھنے والے ہزاروں دلتوں نے بدھ کو اپنے مطالبات کے حق میں بھارتی پارلیمنٹ کے باہر احتجاجی مظاہرہ کیا۔مظاہرہ میں دس ہزار سے زائد دلتوں نے شرکت کی۔مظاہرین نے مطالبہ کیاکہ بھارت میں دلتوں میں غربت کی شرح سب سے زیادہ ہے اور دلتوں کو معاشی مواقع فراہم کرنے کیلئے اقدامات ناگزیر ہیں۔