کراچی (اسٹاف رپورٹر) ناظم کراچی سید مصطفی کمال نے کہا ہے کہ طارق روڈ کو پارکنگ فری بنانے کے لئے سٹی حکومت جھیل پارک کے تین کناروں پر ملٹی اسٹوری پارکنگ پلازہ تعمیر کرنے پر جلد کام شروع کرے گی جس میں کم ازکم 7 ہزار سے زائد گاڑیوں کو بروقت کھڑا کرنے کی گنجائش ہوگی۔ جبکہ گزشتہ 2 سال کے دوران تقریباً پونے 2 ارب روپے کی لاگت سے شہریوں کو معیاری تفریحی سہولتیں مہیا کی ہیں اور شہریوں کو فیملی پارکوں کے علاوہ بڑے بڑے اور خوبصورت پارکوں کا تحفہ دیا ہے۔ان خیالات کا اظہار انہوں نے بدھ کو جھیل پارک کے ترقیاتی کاموں کے معائنہ کے موقع پر کیا۔ انہوں نے ای ڈی او ماسٹر پلان افتخار قائم خانی، ایگزیکٹو ڈائریکٹر پارکس لیاقت علی خان، واٹر بورڈ اور سٹی حکومت کے اعلیٰ افسران کے ہمراہ جھیل پارک کا تفصیلی دورہ کیا اور جاری ترقیاتی کاموں کا معائنہ کیا اور کام کو جلد ازجلد مکمل کرنے کی ہدایات دیں۔ انہوں نے کہا کہ گزشتہ 2 سال کے دوران تقریباً پونے دو ارب روپے تفریحی سہولتیں مہیا کرنے کے لئے خرچ کئے گئے۔ جھیل پارک کراچی کا پرانا اور خوبصورت پارک تھا جہاں نہ صرف جھیل مکمل طور پر تباہ ہوچکی تھی بلکہ اس پارک کی قیمتی زمین پر لینڈ مافیا نے قبضہ کرکے 15 سے زائد مکانات تعمیر کرلئے تھے جبکہ قریب کے رہائشیوں نے بھی اپنے بنگلوں میں اضافہ کرکے پارک کی زمین پر قبضہ کررکھا تھا اور یہ پارک عوام کے لئے نوگو ایریا بنا ہوا تھااب اس جگہ پر ایک نیا جھیل پارک تعمیر کیا جا رہا ہے جہاں ایک خوبصورت جھیل کے علاوہ تفریح کی تمام سہولتیں مہیا کی جائیں گی۔ پارک کو زیادہ خوبصورت بنانے کے لئے اس میں نئی چیزیں تعمیر کی جا رہی ہیں جبکہ جوکنگ ٹریک بھی تعمیر کیا جائے گا۔ انہوں نے کہا کہ یہ کام وہی لوگ کرسکتے ہیں جن کو شہریوں کے مسائل کا ادراک ہو اور جو مسائل حل کرنے چاہتے ہوں اور مسائل کو حل کرنے کا جذبہ رکھتے ہوں۔انہوں نے کہاکہ ہماری کوشش ہوگی کہ رمضان المبارک سے قبل طارق روڈ کو پارکنگ فری زون بنانے کے لئے تین ملٹی اسٹوری کارپارکنگ پلازہ تعمیر کرلئے جائیں جہاں کم ازکم 7 ہزار سے زیادہ گاڑیوں کے کھڑا کرنے کی گنجائش ہو۔ انہوں نے ای ڈی او ماسٹر پلان اور ایگزیکٹو ڈائریکٹر پارک کو ہدایت کی کہ جلد ازجلد پارکنگ پلازہ کے لئے زمین کی نشاندہی کرکے جگہ مختص کی جائے تاکہ اس پر فوری کام شروع کرایا جاسکے۔