جیو آئندہ ماہ سے 3/ نئے پروگرام شروع کریگا
کراچی(جنگ نیوز) جیو ٹی وی نے ہمیشہ سے اپنے ناظرین کی تفریح طبع کیلئے بہترین سے بہترین پروگرام شروع کئے ہیں اور اسکی ہمیشہ سے یہ کوشش رہی ہے کہ وہ معیاری اور تفریح و معلومات سے بھرپور پروگرام پیش کرے۔ اس سلسلے میں جیو ٹی وی جولائی کے مہینے سے تین نئے پروگرام شروع کررہا ہے، اس سلسلے میں ایک تقریب لاہور کے پیرو کیفے میں منعقد کی گئی جس میں ان تین نئے پروگرام کا تعارف پیش کیا گیا۔ ان تین پروگراموں میں ایک ” جیو حنا کے ساتھ “ ہے یہ پروگرام جو ٹاک شو ہے دوبارہ نئے سرے سے اپنا آغاز کررہا ہے اسکی میزبان حنا خواجہ بیات ہیں جو سماجی مسائل کے حوالے سے ایک مقام رکھتی ہیں۔ انھوں نے خواتین کے مسائل کے حل کے حوالے سے بھی بڑا کام کیا ہے، جیو حنا کے ساتھ میں مختلف مسائل کے حوالے سے گفتگو پیش کی جائے گی۔ دوسرا پروگرام ” گولڈن گرل“ ہے اس میں تین خواتین پاکستان کی مختلف سلیبریٹیز کے گھر جاکر ان کے ساتھ وقت گذاریں گی اور ان سے مختلف سوالات کریں گی، انکے درمیان دلچسپ گفتگو سے ناظرین ضرور محظوظ ہونگے۔ ان میں سیاسی شخصیات بھی شامل ہیں ، ا ن تین خواتین میں ایک بشریٰ انصاری کی بہن سنبل ، دوسری شیریں اور تیسری طلعت ہیں یہ تینوں خواتین ہر ہفتہ کسی ایک شخصیت کے گھر کا دورہ کیا کریں گی وہ ان سے کیا گفتگو کریں گی اسکا احوال تو پروگرام دیکھنے کے بعد ہی ہوسکے گا، تیسرا پروگرام بھی ٹاک شو ہے اور اسکا نام ہے ” کنورسیشن ود عتیقہ اوڈھو“ اسکی میزبان عتیقہ اوڈھو ہی ہیں اور وہ ہر ہفتہ کسی ایک سیاسی شخصیت کو مدعو کیا کریں گی اور ان سے گفتگو کریں گی۔ تعارفی تقریب میں شوبز کی شخصیات کے علاوہ میڈیا اور دیگر افراد نے بڑی تعداد میں شرکت کی۔ پروگرام کے بعدمحفل موسیقی کا انعقاد کیا گیا جس میں بڑے فتح علی خان، غلام حسین شگن ، ، حمیر اچنا، فریدہ خانم ، حامد علی خان ، رستم فتح علی خان ، فریحہ پرویز ، ریاض علی ، امتیاز علی نے رات گئے تک اپنے فن کا مظاہرہ کیا۔

__________________