جیو پر پابندی عائد کی، نہ دبئی حکام کو کوئی ہدایات جاری کی ہیں، شیری رحمن
اسلام آباد ( رپورٹ: … صالح ظافر) حکومت نے اعلان کیا ہے کہ جیو انگلش کو ملک بھر میں اپنے پروگرام نشر کرنے کیلئے آئندہ ہفتے لائسنس مل جائے گا۔ یہ اعلان وفاقی وزیر اطلاعات و نشریات نے پارلیمنٹ ہاؤس کے باہر صحافیوں سے بات چیت کے دوران کیا۔ انہوں نے کہا کہ لائسنس جاری کرنے سے متعلق فیصلہ پیمرا بورڈ کے اجلاس میں ہوگا جو آئندہ ہفتے ہوگا۔ ایک اور سوال کے جواب میں انہوں نے کہا کہ دبئی حکومت کی جانب سے جیو نیوز کے دو پروگرام نشر کرنے پر پابندی عائد کرنے کے معاملے میں حکومت کا کوئی عمل دخل ہے اور نہ ہی حکومت پاکستان نے دبئی حکام کو اس حوالے سے کوئی ہدایات جاری کی ہیں۔ انہوں نے یاد دہانی کرائی کہ انہوں نے حامد میر کے پروگرام کیپیٹل ٹاک کے آخری پروگرام میں شرکت کی تھی جس کے بعد اس پروگرام کو پابندی کا سامنا کرنا پڑا۔ انہوں نے کہا کہ حکومت کو اس حوالے سے کسی پابندی سے متعلق علم نہیں لیکن انہوں نے یقین دہانی کرائی کہ حکومت دبئی انتظامیہ کے سامنے اس معاملے کو اٹھانے پر غور کرے گی۔ انہوں نے کہا کہ حکومت نے کسی پرائیوٹ ٹی وی چینل پر کوئی پابندی عائد نہیں کی۔ انہوں نے کہا کہ حکومت اظہار رائے کی مکمل آزادی پر یقین رکھتی ہے اور کسی چینل کو بلاک کرنے کا تو سوال ہی پیدا نہیں ہوتا۔ انہوں نے یقین دہانی کرائی کہ پیپلز پارٹی کی حکومت کے دوران کسی ٹی وی چینل پر کوئی پابندی نہیں لگے گی۔

__________________