کراچی( اسٹاف رپورٹر) پاکستان میں متعین امریکی سفیر این ڈبلیو پیٹرسن نے آج جیو ٹیلی ویژن نیٹ ورک کے دفتر کا دورہ کیا اور حکومت پاکستان کی جانب سے نیوز میڈیا بشمول جیو ٹی وی پر پابندی کے احکامات پر حکومت امریکا کی ” سنگین تشویش “ کا اظہار کیا، امریکی سفارتخانے کی جانب سے جاری کیے گئے پریس ریلیز کے مطابق سفیر پیٹرسن نے نیٹ ورک کے اعلیٰ ادارتی عملے اور انتظامیہ سے باتیں کرتے ہوئے کہا کہ ایسے انتہائی اور غیر مناسب اقدامات صریحاً پاکستان کے بہترین مفاد میں نہیں ہیں اور پاکستان نے ایک مکمل جمہوری معاشرہ بننے کی جانب جو پیش رفت کی ہے اس کے برخلاف ہیں۔ انہوں نے کہا کہ یہ نہ صرف اظہار رائے اور میڈیا کی آزادی کا معاملہ ہے بلکہ ایسے اقدامات متاثرہ خبر رساں اداروں کیلئے معاشی سزا ہوتے ہیں۔ اعلیٰ امریکی سفارت کار نے حکومت پاکستان پر زور دیا کہ وہ میڈیا پر عائد پابندیوں کو جلد از جلد اٹھائے اور فوری طور پر براڈ کاسٹرز کو اپنے پروگرام دوبارہ شروع کرنے کی اجازت دے۔ سفیر پیٹرسن نے زور دے کر کہا کہ میڈیا کو واقعات کی رپورٹنگ کرنے اور اپنی آرا میں لوگوں کو شریک کرنے کیلئے لازماً آزاد ہونا چاہئے۔ جنگ نیوز کے مطابق امریکی سفیر نے جیو نیٹ ورک کے چیف ایگزیکٹو آفیسر میر ابراہیم رحمن اور صدر جیو ٹی وی عمران اسلم کے ساتھ عملے کے دیگر ارکان سے ملاقات کی۔ جیو کے عملے نے امریکی سفیر کو ان دشواریوں سے آگاہ کیا جو پابندیاں لگنے کے بعد سے میڈیا کو درپیش ہیں۔ انہوں نے سفیر کو بتایا کہ کس طرح حکومت نے نہ صرف جیو نیوز بلکہ اس کے کھیل اور تفریح کے چینلوں کو بھی ہدف بنایا ہے۔ انہوں نے سفیر کو بتایا کہ ان پابندیوں سے نہ صرف جیو کے عملے کو پریشانیوں کا سامنا ہے بلکہ کروڑوں لوگ خبر حاصل کرنے کے ایک بڑے ذریعے سے محروم ہوگئے ہیں۔ امریکی سفیر این ڈبلیو پیٹرسن نے کہا کہ انہیں معلوم ہے کہ جیو ایک آزاد اور باوقار چینل ہے جو آزاد میڈیا کے فروغ کے لیے بہترین کوشش کر رہا ہے اور امریکا کو تشویش ہے کہ نہ صرف نیوز چینل بلکہ تفریحی چینل کی بندش سے جیو کو معاشی نقصانات ہورہے ہیں۔ امریکی سفیر نے اس امید کا اظہار کیا کہ جیو جلد ہی دوبارہ کھل جائے گا۔ انہوں نے کہا کہ جیو ٹی وی کی بندش کے سنگین معاملے کو امریکا کے نائب وزیر خارجہ نیگروپونٹے نے صدر پرویز مشرف سے اپنی ملاقات میں بھی اٹھایا تھا۔ سفیر نے کہا کہ نیگروپونٹے نے صدر سے میڈیا کے تعطل پر انہیں امریکی تشویش سے آگاہ کیا اور کہا کہ امریکا کو امید ہے کہ انہیں جلد بحال کر دیا جائے گا۔ امریکی سفیر نے کہا کہ امریکا ایک آزاد میڈیا کی حمایت کرتا ہے۔ انہوں نے کہا کہ جیسا کہ میں نے پہلے بھی کہا تھا کہ جن بوتل سے باہر نکل آئے تو آپ اسے دوبارہ بوتل میں نہیں ڈال سکتیاسی طرح ایک دفعہ میڈیا رپورٹ کرنے میں آزاد ہوجائے تو وہ ایسا کرتا رہے گا اور اس لیے میں جیو کے لیے بہترین خواہشات کا اظہار کرتی ہوں۔

__________________