کوئٹہ/فیصل آباد( نمائندگان جنگ)ملک بھر میں جیو کی بندش کیخلاف مظاہرے ہوئے ،جن میں موجود شرکاء نے نشریات کی بحالی کا مطالبہ کیا،فیصل آباد اور کوئٹہ میں صحافیوں پر پولیس کے وحشیانہ تشدد سے متعدد صحافی زخمی ہو گئے،درجنوں کو گرفتار کر لیا گیا جنہیں بعد میں رہا کر دیا گیا،ملک بھر میں احتجاجی ریلیاں نکالی گئیں،حکومت کیخلاف نعرے لگائے گئے،پابندیوں کیخلاف صحافیوں نے علامتی قلم چھوڑ ہڑتال بھی کی۔تفصیلات کے مطابق جیو ٹی وی کی بندش، میڈیا پر پابندیوں، صحافیوں کی گرفتاریوں اور تشدد کے علاوہ ایمرجنسی کے نفاذ کے خلاف ملک بھر میں صحافیوں اور سول سوسائٹی کا احتجاج بدھ کے روز بھی جاری رہا۔ مظاہرین نے کراچی اوردیگر شہروں میں صحافیوں پر تشدد اور ان کی گرفتاریوں کی شدید مذمت اور میڈیا پر پابندیوں کے خاتمے تک احتجاج جاری رکھنے کا اعلان کیا۔میڈیا پر پابندیوں  صحافیوں کو ہراساں اور بعض نجی نیوز چینلز پر پابندیوں کے خلاف گزشتہ روز اخباری صنعت سے تعلق رکھنے والے افراد نے کوئٹہ پریس کلب کے سامنے احتجاجی مظاہرہ کیا اس موقع پر صحافیوں نے پوسٹر اٹھا رکھے تھے جن پر مختلف نعرے درج تھے بعدازاں صحافیوں نے احتجاجی ریلی نکالی جس پر پولیس نے 25 صحافیوں کوگرفتار کرکے سٹی پولیس اسٹیشن منتقل کر دیا جہاں کئی گھنٹے تک حراست میں رکھے جانے کے بعد صحافیوں کو رات کو رہا کر دیاگیا پولیس اسٹیشن منتقل کئے جانے کے فوراً بعد صحافیوں سے ان کے موبائل فون لے لئے گئے۔نمائندہ جنگ کے مطابق فیصل آباد پریس کلب میں پولیس نے دھاوا بول کر صحافیوں کی ریلی پر اندھادھند لاٹھی چارج اور شیلنگ کر دی۔ پریس کلب دو گھنٹے تک میدان جنگ بنا رہا۔ لاٹھی چارج سے کیمرہ مین محمد عثمان اور آنسو گیس کا شیل لگنے سے خاتون فوٹوگرافر حمیرا شدید زخمی ہو گئی جبکہ پولیس نے 4 صحافیوں حاجی محمد بلال، محمد قمر بٹ کیمرہ مین شہزاد شامی اور ملک معراج کے علاوہ مسلم لیگ (ن) کے سابق ایم پی اے رانا محمد افضل کو حراست میں لے کر تھانہ ریل بازار منتقل کر دیا جس پر صحافیوں نے تھانہ کا گھیراؤ کرکے شدید احتجاج کیا۔ملتان میں 2مظاہرے ہوئے ایک مظاہرہ ایم یو جے (برنا گروپ) کے زیر اہتمام پریس کلب میں ہوا، دوسرا مظاہرہ ملتان پریس کلب کے باہر پاکستان یونین آف جرنلسٹس (دستور) راؤ شمیم اصغر کی قیادت میں کیا گیا، ڈیرہ کے صحافیوں نے میڈیا پر حکومتی پابندی کے خلاف زبردست جلوس نکالا اس جلوس میں مسلم لیگ ن کے اراکین بھی شامل تھے۔ جلوس کے شرکاء کا مطالبہ تھا کہ میڈیا پر پابندی ختم کی جائے جیو اور اے آر وائی کی نشریات بحال کی جائیں۔جیو اور دیگر نجی ٹی وی چینلز کی بندش اور کراچی میں صحافیوں پر تشدد کے خلاف آزاد کشمیر میں صحافیوں نے احتجاجی مظاہرے کئے، بدھ کے روز بھی پریس کلبوں، اخباری دفاتر پر سیاہ پرچم اور بازوؤں پر سیاہ پٹیاں باندھیں۔ باغ میں صحافیوں نے علامتی قلم چھوڑ ہڑتال کی اور 5 منٹ کی خاموشی اختیار کی۔ برطانوی شہر مانچسٹر میں صحافیوں نے پاکستانی قونصلیٹ کے باہر احتجاجی مظاہرہ کیا۔

__________________