کراچی(اسٹاف رپورٹر) سندھ بار کونسل اور سندھ ہائیکورٹ بار نے جیوکی نشریات بحال کرنے کا مطالبہ کرتے ہوئے آج عدالتوں کے بائیکاٹ کا اعلان کیا ہے، دونوں باڈیز نے سپریم کورٹ بار کے صدر بیرسٹر اعتزاز احسن اور وکلاء رہنماؤں طارق محمود، علی کرد اور منیر اے ملک سمیت تما م وکلاء کو رہا کرنے کا مطالبہ کیا ہے، سندھ بارکونسل کااجلاس وائس چیئر مین محمدامین لاکھانی کی صدارت میں منعقد ہوا۔ایک قرارداد منظور کی گئی جس میں مطالبہ کیاگیا ہے کہ جیوٹی وی پر عائد پابندیاں فوری طور پر ہٹائی جائیں۔عدلیہ کو آزاد کیاجائے اور ایمرجنسی ختم کی جائے، بیرسٹر اعتزاز احسن،طارق محمود،علی احمدکرد،کورہاکیاجائے۔پی سی او کو واپس لیاجائے۔تمام اداروں کوآئینی کے مطابق کام کرنے کا موقع دیاجائے۔الیکٹرانک میڈیا کومکمل طورپر کام کرنے کا موقع دیا جائے تاکہ عوام کوسچی خبریں مل سکیں۔سندھ ہائی کورٹ بار ایسوسی ایشن کے صدر ابرار حسن کی صدارت میں جنرل باڈی کا اجلاس ہوا۔ اجلاس میں بیرسٹر اعتزاز احسن، علی احمد کرد، طارق محمود، منیر اے ملک اور ملک کے دیگر گرفتار وکلاء کی رہائی کا مطالبہ کیا ہے بطور احتجاج 23/نومبر کو عدالتوں کا مکمل بائیکاٹ کرنے کا اعلان کیا ہے۔ ایک اور قرارداد میں مطالبہ کیا ہے کہ الیکٹرانک میڈیا پر عائد پابندیوں کو ختم کیا جائے۔ گرفتار شدہ صحافیوں اور وکلاء پر تشدد کی مذمت کی ہے، جیو سمیت تمام چینلز کی بحالی کا مطالبہ اور صحافی برادری سے مکمل اظہار یکجہتی کیا۔ بار کے صدر ابرارحسن نے خطاب کرتے ہوئے کہا ہے کہ میں تمام حکومتی جبر کے باوجود یہ واضح کردینا چاہتا ہوں کہ آمر ٹولہ یہ جان لے کر ہمارے پائے استقلال میں جنبش نہیں آئے گی۔ وکلاء 8/ماہ سے انتہائی سخت زندگی گزار رہے ہیں انہیں شدید معاشی مسائل کا سامنا ہے مگر ہم جانتے ہیں کہ عظیم مقصد کیلئے جدوجہد کر رہے ہیں اور تمام قوم کی نگاہیں ہم پر لگی ہوئی ہیں ہم انہیں مایوس نہیں کریں گے۔ پاکستان بار کونسل کے رکن رشید اے رضوی نے کہا کہ اس جدوجہد کے رہنماؤں کو اب بھی قید میں رکھا ہوا ہے۔ انہوں نے کہا کہ گرفتار شدہ وکلاء پر قید تنہائی مسلط کرنے کیخلاف 23/نومبر کو عدالتوں کا مکمل بائیکاٹ کریں گے پاکستان بار کونسل کے رکن محمد یاسین آزاد نے کہا کہ ہماری جدوجہد کامیابی تک جاری رہے گی۔ سینیٹر عبداللطیف کھوسہ نے کہا کہ اس وقت ملک وقوم پر بڑا کڑا وقت ہے۔ ہائی کورٹ بار کے سابق صدر اختر حسین، منیر الرحمن نے بھی خطاب کیا، بار کے اجلاس میں پروفیسر این ڈی خان ساتھی ایم اسحاق، مشفع احمد، احمد نفیس عثمانی، فہیم ریاض صدیقی، ارشد جدون، دلاور حسین، سالم سلام انصاری، سردار عارف، عبدالوہاب بلوچ، نور ناز آغا وغیرہ موجود تھے۔ پاکستان بارکونسل کیاجلاس میں رکن رشیداے رضوی ،سندھ بار کونسل کے رکن ابرار حسین ،ساتھی ایم اسحاق کراچی بار کے صدر افتخار جاوید قاضی،سیکریٹری نعیم قریشی،ملیر بار کے صدر ظہور حسین مہر ،خواجہ منصورمحمدعاقل،محمدعلی عباسی ،محمود الحسن ،حنیف بھٹی ،عبداللہ چانڈیو،فہیم ریاض صدیقی ،خلیل ڈوگراور نور ناز آغا نے شرکت کی اور متفقہ طور پر آئین کی بحالی ،قانون کی بالادستی اور عدلیہ کی آزادی کامطالبہ کیا۔

__________________